NE-a tangkhangte an rawn haw mek
India ram pumah inkhàrkhip a nih avanga hmarchhak state pali - Assam, Manipur, Meghalaya leh Tripura-a Mizoram mi tangkhangte hruai haw mek zel an ni a; Manipur-a tangkhangte bik zinga Mizorama haw duhte chu May 1, Zirtawpni zan dar 7:30 khan zawh a ni. Nimin tlai dar 5 thleng khan Vairengte kaltlanga rawn haw mi 906 an tling tawh.
Manipur aṭangin Mizoramah mi 292 an rawn haw a, mipa 138 leh hmeichhia 154 an ni a; Aizawl, Lunglei, Siaha, Champhai, Lawngtlai, Kolasib, Khawzawl, Saitual leh Hnahthial district mite an ni. An vai hian Mizoram sorkarin an rawn luhna tur (entry point)-a a ruahman, Khawkâwn kaltlang vekin an rawn lut.
Mizorama an luh hmain Tuivai kam, Manipur state chhungah an chuanna lirtheite chu hri thahna hmanga phuh (sanitise) zel a ni a, kut silna tur dah a ni. Mizoram chinah an hriselna dinhmun enfiah vek a ni bawk.
Ngopa SDO (Civil) Vanlalṭanpuia chuan, Manipur-a tangkhangte Mizorama an rawn haw a, ramria endik hna thawktu hrang hrang chungah lawmthu a sawi a ni.
Vairengtea screening point-a medical officer duty Dr C Vanlalhlimpuia chuan Vanglaini palai zawhna chhangin, Assam leh Meghalaya-a tangkhang rawn haw tawhte chu nimin tlai dar 5 thleng khan mi 906 an nih thu a sawi.
Vairengte kaltlanga Mizorama rawn hawte chu - Aizawl district mi 415, Lawngtlai district mi 156, Siaha district mi 121, Lunglei district mi 109, Kolasib district mi 49, Serchhip district mi 26, Champhai district mi 15, Mamit district mi 6, Saitual district mi 5 leh Khawzawl district mi 4 an ni. Hmarchhak state pali
aṭanga hruai hawte hi an rawn luhna ramria screening point-ah uluk taka lo endik zel an nih bakah, lirtheite pawh disinfectant hmangin phuh fai zel a ni. An district ṭheuhah sorkar thuneitute'n an lo endik leh a, chumi hnuah, an inah haw loin, quatantine centre-ah dah nghal an ni a, ni 14 chhung khung hran an ni ang.
NE state aṭanga haw Champhai mi leh sate zingah May 2, Inrinni thleng khan mi 22-in Champhai an thleng tawh a, quarantine centre-ah dah luh vek an ni. Mi 22 zinga 16 chu Manipur aṭanga haw an ni a, mi paruk chu Assam aṭanga haw an ni thung.