Khaw dáiah police an khauh dawn

Mizoram police officer-te chuan nimin khan IGP (Law & Order) LH Shanliana kaihhruaiin Covid-19 donaa police-te hnathawh dan an thlirlet a; khawpui dáiah mi ṭhen­khat an kal khawm ṭhin tih hriat a nih avang­in, chutiang chu a awm zui loh nan dan leh thupek khawng taka ken­kawh a nih tur thu an tarlang.

Meeting chuan, "Hri léng laka kan him nana lockdown kalpui chhungin mi ṭhenkhat, sorkar thupek zâwm loin, khawi maw lai, entirna'n khaw páwn deuhahte an kal khawm ṭhin tih hriat a ni a, hei hi a ṭha lo hle. Hetiang hi a thlen loh nan dan leh thupek khawng taka kenkawh  tur a ni," an ti.

Sorkar hmalaknain state páwna Mizoram mi tangkhangte haw hun siam mek a nih thu leh chu'ng mite dahna hmun quarantine centre-ah police-te uluk taka an duty vek thu an tarlang a; lockdown chhunzawm lehnaah sorkarin inkaih­hruaina thar a siam kenkawh nan police duty a ṭul anga siam rem zel a nih tur thu an sawi.

Sawihonaah hian DIG pathum, SP pahnih leh commandant pahnih, Ai­zawla zonal officer pariat, control room-a duty mi pahnih, SDPO pathum leh Aizawla police station OC-te an tel a; DIG (Northern Range) Lalbiakthanga Khiangte leh Traffic SP Rodingliana Chawngthu ten inkhârkhip chhunga inkaihhruaina chhuak thar mila police duty dan tur an sawifiah a ni.