Vairengte - Sairang kawng siam turah Revenue leh Forest ram la chingfel lo ; Sorkarin zangnadawmna pe chhuak turin a hriattir

Ministry of Road Transports & Highways (MoRTH) hmalaknaa NHIDCL-in Vairengte leh Sairang inkar kawngpui thlúr lí (four lane)-a an zauh turah Land Revenue & Settlement (LRS) leh Environment, Forest & Climate Change (EFCC) department-te ram inchuh chu sorkar bultumin sawiho ni tawh mahse chinfel a la ni lo.

Hetih lai hian, Mizoram sorkar chuan zangnadawmna pe chhuak tawh turin ram lâk leh zangnadawmna buaipui tura a ruat competent authority for land acquisition (CALA), Kolasib Additional DC chu a hriattir a ni.

LRS leh EFCC department-te'n ram inchuh an neih chinfel a nih theihna atan Mizoram sorkar chuan GAD kaihhruaina hnuaiah sawiho turin thutlukna a siam a; GAD Secretary kaihhruaiin department pahnih hotute chu August 19, 2022 khan an ṭhukhawm a, mahse, ram inchuh chu chinfel a la ni lo.

Forest Reserved area-a an puan chinah mi eng emaw zatin LSC leh pass dangte an nei a, VC pass tih loh zawng chu ram man hlutna leh thlai man dawng tura tih an ni. Hetih lai hian, kawng zauhna atana forest clearance lak a nih dawnah EFCC department-ah forest reserved lakna man pek ve tho a ngai a; NHIDCL chuan zangnadawmna leh forest clearance man an pe kawp thei lo thung.

GAD Secretary hoa ṭhut­khawmah hian forest reserved huam chhunga mi ni lo zawng ram lak tawhte chu zangnadawmna pek turin thutlukna siam a ni a; forest reserved area-a mite chu thlai man chauh pek rih phawt a, ram hlutna man chu a tahtawla chinfel tura tih a ni.

Hetih lai hian, kawngpui zauhna turah hian forest reserved chhung ni lo, EFCC department-in thing an phunna (deemed forest) km. 13.23 a awm a, chungahte chuan pass nei an awm a nih pawhin zangnadawmna an dawng thei dawn lo.

Vanglaini palai zawhna chhangin CALA chuan, zangnadawmna pe chhuak turin hma an la mek tih a sawi a, "August 19, 2022-ah an ṭhukhawm a, an meeting minutes August 20 khan kan dawng. Tunah hian buaipui ngaite kan buaipui mek a, notice-te chhuah ṭhat leh a ngai," a ti.

Ram lâk tur tihfel hnuah mi eng emaw zatin ram an hralh leh tih sawiin CALA chuan, "Ram inleisakte hi an rawn in report tawh si lo a, chuvangin, document pawh kan dil ṭha leh vek dawn, tihsual palh a awm kan hlau," a ti a; kar leh lamah chuan zangnadawmna sem chhuah theih an inbeisei thu a sawi.