Kalphung ṭha kan mamawh - Lalsawta

Mizoram Pradesh Congress Committee (MPCC) president Lalsawta chuan, Mizoram chu mi taima leh rinawm­te dinchhuahna ramah an siam theih thu leh chutiang ni tur chuan kalphung (system) ṭha mamawh a nih thu a sawi.

Lalsawta hian nimin khan Aizawl West-II Special Block Conference-ah thu sawiin, "Mizoram mamawh ber chu system ṭha a ni. Mizoram hi taima leh rinawmte dinchhuahna ramah kan siam thei a, system ṭha hi kan mamawh ber chu a ni," a ti.

Pathian leh mipui laka politician-te mawh­phurhna chu ram rorelna ṭha siam a nih thu sawiin Lalsawta chuan, "Pathianin hnam tin ram leh mipui min pe a, enkawla hmang ṭangkai thiam apiang chuan ram nuam leh hmasawn an siam ṭhin. Kan ram hi dinhmun chhe takah a ding mek a, siamṭhaa Mizoram tungding turin kan rama eirûkna leh sum ûm âtchilhna tihbo a, retheih leh hah huamte'n hma kan lak a ngai," a ti a; chutiang tur chuan Congress hruaitute an inhuam a ngaih thu a sawi.

Congress party Presi­dent chuan, mipuiin eizawn­na nghet an neih theih nan cooperative society leh MSME uar leh thlai zawrhna leh sâwngbawlna rintlak buatsaih a ngaih thu sawiin, "Hmasawnna leh eizawnna ngêlnghet neihna turah ngaihtuah ngai pawimawh pahnih - environment humhalh leh taimate leh rinawmte hlawhtlinna ramah kan ram hi kan siam a ngai. Ram rorelna ṭha nei turin sorkarin thuneihna insem zâi (decentrali­sation) hi a tihpuitlin a pawimawh a ni," a ti.

Inkhawmah hian MPCC hruaitu dang - H Rohluna leh H Zothang­liana ten thu an sawi bawk.