ZPM flagship chu mipui an ni - Sapdanga

ZPM working presi­dent K Sapdanga chuan August 24, Nilaini zan khan Farkawn YMA Hall-a vantlang inkhawmah thu sawiin, ZPM flagship chu mipui an nih thu leh mipui khai chhuah an tum thu a sawi.

K Sapdanga chuan, sorkar kal tawhte'n ngaih pawimawh leh tum bik, flagship an nei ṭhin tih sawiin, "Keini pawhin kan nei a, kan flagship chu mipuite an ni. Mipuite hi kan khai chhuak dawn a, a hmanrua - policy pawh hmân ní lawkah kan tlangzarh tawh. Policy hi kan kawng zawh tur chu a ni," a ti.

Dik lo taka thil tih tam tak an hmuhte'n politics-ah a hnûk lut tih sawiin Sapdanga chuan, "Kristian state-a roreltute hian Kristian angin ro kan rel em? Thuneitute’n khaw êngah dan an palzút a, tuna kan kal danah hi chuan dan hian mu leh mal a nei lo a ni ber. Heng zawng zawng hi ZPM sorkar hunah a reh ang," a ti a; party-a awm lo mipui tam takin ZPM chu sorkar tura an duh thu leh Zoram tluchhe mek tungding tura ṭan an lak thu a sawi.

ZPM PAC member Thangkhuma pawhin thu sawiin, ZPM tana cam­paigner ṭha ber chu tuna Chief Minister hi a nih thu a sawi a, "Kalphung thar awmzia hi kalphung dik tihna a ni a, dikna rahbehna lak aṭangin kalphung thar, kalphung dik kan hmu dawn a ni," a ti a; kalphung thar a thlen theih nan ke pên turin ṭhalai, nu leh pa, tlawmngai pawl leh kohhrante a sáwm a ni.

ZPM hruaitute hian Nilaini leh nimin khan Samthang, Vaphai, Farkawn, Leithum leh Khuanglengte an tlawh a; Khuanglengah hian ZPM East Tuipui North Block huam chhung aṭangin mi 144 chu ZPM-ah an lawm lut niin ZPM thuchhuah chuan a tarlang.