Mizoram sorkarin ni 14 chhung RBI-ah cheng nuai 20 chiah a nei

Mizoram sorkar chuan kumin July 21 aṭanga August 2 thleng khan Reserved bank of India-a a account-ah Rs 20,00,000 chiah a nei char char a, August 19, 2022-ah chuan Rs 42,37,09,497.61 (cheng vbc. 42.37) a nei leh tawh.

RTI Act hmanga zawhna chhannaa a lan danin, Mizoram sorkar chuan July 20, 2022 khan RBI-a a account-ah Rs 20,99,505.58 (nuai 20.99) chiah a nei a; July 20 hi sorkar laipui thupek anga centrally sponsored scheme (CSS) sum, March 31, 2022 hma lama dawn tawhte a kawltu tur department hnena pek chhuah hun hnuhnung a ni.

Mizoram sorkar chuan kumin July 21 aṭanga August 2 thleng khan RBI-ah cheng nuai 20 chiah a nei char char a, August 3-ah erawh chuan Rs 1,05,71,47,997.86 (vbc. 1,05.71) a nei chho a; August 3 hi sorkar laipuiin Mizoram hnena Post Devolution Deficit Grant cheng vbc. 134.58 a rawn pek ní a ni.

August 3, 2022 aṭangin Mizoram sorkarin RBI-a sum a neih zat a pung hret hret a, a neih tam ber lai August 10 khan Rs 7,13,38,64,951.64 (vbc. 713.38) a nei. August 17-ah Rs 83,99,45,090.02 neiin, cheng vbc. 100 a nei tling lo leh ṭan a; RTI Act hmanga zawhna chhannaa tarlan hman chin, August 19-ah chuan Rs 42,37,09,497.61 (vbc. 42.37) chiah a nei leh tawh a ni.

Hetih lai hian, Mizoram sorkar chuan a flagship programme - Socio Economic Development Programme (SEDP)-ah mipui hnenah sum faiin ṭanpuina thawh khatna Rs 25,000 zelin sem ṭan a tum hnai a; ruahman dan chuan Assembly bial tina chhungkaw 1,500 ṭheuh hnenah sum pek tum niin, bial 40-ah chuan chhungkua 60,000 a tling.

Chhungkaw 60,000 hnenah Rs 25,000 ṭheuh pek a nih chuan Rs 1,50,00,00,000 (vbc. 150) a ngai a, RBI-a Mizoram sorkarin August 19, 2022-a sum a neih zat Rs 42,37,09,497.61 aiin Rs 1,07,62,90,502.39-in a tam zawk. SEDP first instalment atana sum mamawh aṭangin 28.25% chauh a ni.