KHAWTHLIR

Thisen pe
Mizoram Law College NSS chuan College Foundation Day vawi 39-na pualin Civil Hospital, Aizawl Blood Bank-ah thisen unit 63 an pe a, petute mipa 45 leh hmeichhia 18 an ni. KṬP, Lengpui Branch pawhin an din champha pualin nimin khan an kohhran hall-ah Civil Hospital, Aizawl tan thisen unit 49 an pe a, petute mipa 37 leh hmeichhia 12 an ni.

Mei zu mi 4 man
Aizawl District Anti Tobacco Squad chuan nimin khan Secretariat-ah phal lohna hmun a mei zu an awm leh awm loh an enfiah a, phal lohna hmuna mei zu mi pali manin, pawisa an chawitir. Anti Tobacco Squad hotute chuan, puipunna hmun hrang hrang ngawrh lehzuala endik an tum thu an sawi.

PBS farewell
Presbyterian Bible School chuan batch 52-na zirlaite pualin nimin khan Mission Veng Kohhran Hall-ah Farewell and Dedication Programme an hmang a; PBS principal Rev. Lalrinsanga'n kaihruaiin, Synod statistician Rev. Lalsangbera'n zir chhuakte hnenah certificate a hlàn. PBS-ah hian zirlai 2,518 awm tawhin, mi 2,130-in an zo a; batch 52-naah zirlai 39 awmin, zirlai 32 an pass a ni.

Chawlhhmun endik
Mizoram Pollution Control Board hnuaia Single Use Plastic Enforcement Squad chuan nimin khan Lengpui Airport leh Bairabi rél chawlhhmunte an tlawh a, hman khat daih sarâng khapna zawm a nih dan an enfiah. Thlawhtheihna ṭumhmun leh rél chawlhhmunte chu hman khat daih sarâng hman lohna hmunah puan a lo ni tawh a; enfiahnaah hian dan an zâwm ṭha tih hmuh a ni.

Intihsiakna hawng
Khawzawl district bawrhsap CC Lalchhungkima chuan nimin khan Khawzawl Zaingen YMA Hall-ah Mizoram Khawpui Fai Intihsiakna 2022 leh India Ram Khawpui Fai Intihsiakna, Swachh Survekshan 2023 a hawng. Khawpui chhunga VC hrang hrang hnenah bawlhhlawh báwm sem nghal a ni.