DC-te thil pawimawh sawipui

General Administration department (GAD) secretary Navin Kumar Choudhury chuan nimin khan district hrang hrang bawrhsap leh an aiawhte video conferencing hmangin an hnathawh dan leh harsatnate a sawipui.

Navin Kumar Choudhury chuan district administration-te hnathawh dan leh tun aia ṭha zawka mipui rawngbawl hna an kalpui theih dan kawng hrang hrangte leh ruahmanna eng emaw zat ṭha nia a hriat sawiin, a thil sawite chu a taka kalpui turin DC tinte a chah a ni.

Mipuite hnena inrelbawlna ṭha zawk a thlen theih nana DC-te mawhphurhna leh hemi atana ṭul leh pawimawh nia a hriatte sawiin GAD Secretary chuan, "Mipuite vuivaina aw leh an harsatna tawhte thuneitute hnena a thlen vat theih nan district a grievance redressal mechanism siam a pawimawh," a ti.

Navin Kumar chuan district mipuite mamawh chiang zawka DC-te'n an hriat theih nan district huam chhunga khuaahte zan riaka khua tlawh a ṭhat thu sawiin, "District officer hrang hrang te hnathawh vil te, emergency services leh ṭul pawimawh dangte entik lai pawha a ṭhat theih nana vilte ngaih pawimawh tur a ni," a ti a, district-ah hmasawnna hna hrang hrang thawh mekte chu enzui leh an thlen chinte a khat tawka enpui turin DC-te a chah.

District tinin an district potential-te an hriat a ṭul tih sawiin, "Chu chu entin nge mipui tam zawkin an hlawkpui theih ang tih kawng dapte chu ngaihpawimawh tur a ni," a ti.

GAD Secretary sawi danin, meeting hi thla tin Ningani tawp berah neih ṭhin a ni dawn a, DC-te hnathawhte bakah an harsatna te sawiho ṭhin a ni ang. Secretary hrang hrangte pawh meeting-ah telin an department chan ṭheuha district hrang hranga hmalakna an neih mek leh ruahmanna an siamte DC te an sawipui ṭhin dawn a ni.

DC-ten henga harsatna an neih leh tawhte chu a department changtu secretary ah an thlen thei ang.

Nimina meeting-ah hian a bulṭanna atan Health & Family Welfare secretary Esther Lalruatkimi leh School Education secretart Dr Lalzirmawia Chhangte te an tel a ni.