Rs 25,000 sem tum - mipui hmuhsitna - Lal Thanzara

Congress party vice president Lal Thanzara chuan, MNF party kaihhruai Mizoram sorkarin Rs 3,00,000 sem an intiam laia Rs 25,000 sem an tum chu mipui hmuhsitna a nih thu a sawi.

Lal Thanzara hian East Tuipui biala khaw hrang hrang a fannaah thu sawiin, "MNF hian an sorkar chuan SEDP-ah cheng nuai 3 ṭheuh pek an tiam a, chumi beisei chuan mipuiin sorkarna an pe. Tunah Rs 25,000-ah an tihniam leh a, cheng nuai 3 an sem theih dawn loh vanga MNF in mipui beidawng lutuk tuam dam an tumna a ni a, mipui hi min hmusit hle a ni," a ti.

Congress party-in mipuia an thutiam chu an tihlawhtling zel ṭhin nia sawiin Thanzara chuan, "Rambuai laiin remna leh muanna te, rangva in chung nei lo tan rangva sem te, NLUP-a Rs 30,000 leh Rs 1,00,000 semte kan tiam tawh a, sorkarna kan chanin kan intiamnate kan tihlawhtling zel ṭhin," a ti a; MNF chu an sorkar hmasaka MIP hmanga Rs 50,000 sem tiam a, Rs 7,000 semtute an nih thu a sawi.

MPCC Vice President chuan, sorkar hnathawk zingah mi fel, hlemhletna duh lo, eiru duh lo, ṭhahnemngai taka thawk ṭhin tam tak an awm thu leh sorkar ṭha, hruaitu rinawm, eirûk laka fihlim chief minister neih an duh thu sawiin, "Chutiang mi chu kan hotupa Pu Lalsawta hi a ni. Sorkar hna a thawh lai te, minister a nih laitein eiru thei dinhmunah a awm chungin hlemhlêtna lakah hmingchhiatna a nei miah lo," a ti.