ASF vanga vawk suat zangnadawmna sum AH&Vety-in bank-ah an dah tawh

Animal Husbandry & Veterinary department chuan vawk pûl hri, African Swine Fever vanga kum 2021 chhunga vawk suat neitute hnena zángnadawmna pek tur chu bank-ah a thawn tawh. Bank-in zangnadawmna dawngtu turte account-a an thun hun nghah mek a ni.

AH&Vety department hotute chuan Vanglaini palai zawhna chhangin, zangnadawmna dawngtu tur chhungkaw 2,488-te chu an awmna district-a ṭhen a, an bank account number-te computer-ah dah vek a ngaih avangin hun a duh rei niin an sawi a, "Tunah chuan bank-ah kan thawn vek tawh a, bank-in a dawngtu turte account-a an thun hunah zangnadawmna an dawng thei tawh ang," an ti.

AH&Vety department hian zangnadawmna dawngtu turte bank account-a pawisa thun dan tura an tum dan hmasaah harsatna an tâwk a; zangnadawmna sum chu single nodal sgency (SNA) account-ah thun tur niin, SNA chu public financial management system (PFMS) hnuaia kal vek tur a ni. Zangnadawmna sum tur SNA-a an dah hnuah PFMS portal-ah a lan theih loh avangin sum pek chhuah dan tur dang an dap a, cheque hmangin bank-ah an pe a ni.

Mizoram sorkar chuan kum 2021 chhunga vawk suat neitute zangnadawmna pek tur sorkar laipuiah a dil a, vawk 10,910 atan Rs 11,69,94,414 an dil a ni. First instalment Rs 5,84,97,000 chu March 22, 2022 khan sorkar laipuiin Mizoram sorkar a rawn pe. Sorkar laipuiin a pek zat chiah Mizoram sorkarin a pek ve a ngai a, a vaiin Rs 11,69,94,000 a tling.

Mizoram sorkara Finance department chuan sorkar laipuiin a rawn pek leh Mizoram sorkarin a pek ASF zangnadawmna sum, chhungkaw 2,488 hnena pek tur Rs 10,48,42,200 chu July 1, 2022 khan AH&Vety department hnenah a pe a ni.