Loan apps. hmanga inbumnaah Police-ten thurâwn an ti chhuak

Mizoram Police chuan nimin khan thuchhuah siamin, tunlai hian mobile phone apps. hmanga loan pe thei anga insawi chungchangah complaint an dawn hnem thu tarlangin, "Heng mobile apps hi website kaltlang hian loan amount tlemte pek an ni ṭhin," an ti.

Loan an rulh zawh hnu pawhin 'payment failed' anga chhuanlamte siamin, rul nawn leh tura nawrin nasa taka tihbuai chhunzawm an ni ṭhin tih tarlangin Mizoram Police chuan, "An rulh nawn duh loh chuan an thlalak mawi lo deuh thehdarhsakahte vau ṭhin an ni," an ti a, hmun ṭhenkhatah phei chuan an chhungte pawh tihbuaiah misualte hian an vau ṭhin thu an tarlang.

Mizoram Police tarlan danin, hetiang apps hi install a nihin, contact number te, gallery etc. te access theihna permission a dil ṭhin a ni. Phone neitu in a remtihna (permission) a pek dan azirin heng app-te hian phone neitu nihna hrang hrang - thlalak, audio, video, messages, contact list adt. a access thei a ni.

Data pawimawhte chu misualte'n ralkhat aṭangin an lo la chhawng thei ta a, chumi hmang chuan anmahni leh an chhungte chu an vau ta ṭhin a ni.

Police-te thurâwn
1) Loan pe thei anga insawi application download loh tur
2) I mobile phone-ah application thar i install in, permission pek a ngaih hunah i mimal thil pawimawh access thei lo turin fimkhur ang che
3) I phone-ah nangma download ni lo application a lo in-install em tih enfiah ṭhin ang che
4) Hetiang thila buaina i tawk a nih chuan ngawihpui mai loin police hnenah thlen ngei ang che
5) Mi hman tur bank account hawnna atan i documents hman tir lo la, i SIM Card pawh tumah hman tir lo ang che. Heng thilte hi misual tan nasa taka hmansual theih a ni