August thlaah hripui vei 3,745 hmu tawh

August 24, Nilaini khan Mizoramah Covid-19 vei mi 129 hmuh chhuah a ni a, August thla chhungin mi 3,745 hmuh chhuah a ni tawh. Nimin khan hripui vei dam tawh mi 109 chhuahtir an ni a, Covid-19 vanga thi an awm lo.

Nilainia Covid-19 positive hmuh thar mi 129-te chu mipa 61 leh hmeichhia 68 an ni a, ZMC RT-PCR laboratory-a hmuh chhuah mi pakhat, TrueNAT hmanga hmuh pakhat leh RAT hmanga hmuh mi 127 niin, swab sample endik zat 623 aṭanga positivity rate chu 20.71% a ni.

District tinah hripui vei hmuh a ni a; district hrang hranga hmuh zat chu - Aizawlah mi 44, Lungleiah 24, Lawngtlaiah 16, Mamitah 12, Siahaah 10, Serchhipah pasarih, Saitualah panga, Champhai, Kolasib leh Hnahthialah pathum ṭheuh leh Khawzawlah pahnih a ni.

IDSP record angin, Mizoramah Covid-19 vei 2,36,545 hmuh chhuah a ni tawh a, mipa 1,10,142 leh hmeichhia 1,26,403 an ni a, mipa aiin hmeichhia 16,261-in an tam zawk. Nimin tlai dar 5 thleng khan mi 2,35,257 (99.46%) chhuahtir an ni tawh a, mi 717 (0.30%) thi tawhin, enkawl mek mi 571 (0.24%) an awm.

Kum 2011 chhiarpui angin, Covid-19 vei hmuh tawh 2,36,545 chu state mipui zat aṭangin 21.56% a tling a, India rama state zingah a sang ber. Mi 1,000 zelah positive 215 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.