MNF-in Chakma candidate neih loh ṭha a ti - Zoramthanga

MNF president Zoramthanga chuan, NGO Coordination Committee (Joint NGO)-in kum 2018 Assembly inthlanah Chakma candidate nei lo tura political party-te an ngenna chu MNF party-in ṭha an tih thu a sawi.

Nimina Mizo Hnam Rûna inkhawmah thu sawiin Zoramthanga chuan, “NGO Coordination Committee-in kum 2018 MLA inthlan lo awm turah hian Chakma candidate an awm loh nana hma la turin political party-te a ngen a. Hei hi MNF party chuan ṭha a ti a, he mi tihlawhtling tur hian Joint NGO hi hma la zel turin a duh bawk a ni,” a ti.

Zoramthanga chuan, Joint NGO-in minister Dr BD Chakma báng tura an phût chu âwm an tih thu sawiin, "MNF party pawhin báng ngei turin kan phût a ni,” a ti a; Mizoram quota-a technical course zir tur thlannaah MNF-te'n Chakma-te chu category I-ah an dah tawh nia sawi awm chu a dik lo nia sawiin, Chakma-te chu category I-ah an la awm ngai lo niin a sawi.

Chakma Autonomous District Council (CADC) ṭhiah a nih theih nan inremna thuthlung ziah dawnah nasa takin ṭan an khawh nia sawiin Zorama chuan, "Amah­erawhchu, Constitution Amendment anga CADC hi lo piang a ni a, rei tak Constitution anga an lo kalpui tawh, tuna tihdanglam a nih mai chuan India mipui ngaihah dawl zawra an zawrna tur a ni a, an ti thei ta ngang lo,” a ti. CADC ṭhiah chu MNF duh dan a la ni reng tih sawiin, "Khatih laia sorkarna changtu Congress sorkar kha CADC ṭhiah remti lo tlattute an ni," a ti.

MNF President chuan, MNF-in engtik lai pawha tihpuitlin a duh, a hmachhawp chu ‘Greater Mizoram’ a nih thu sawiin, "Sorkar laipuiah leh Mizoramah Congress an sorkar chhung chuan hei hi chu thil har a ni ang. Greater Mizoram hi India sorkar nen remna zawnga kan inbiaknaah pawh nasa takin kan nawr a, a hun a thleng rih lo mai niin a lang," a ti a; hmun hrang hranga Mizote an inzawmkhawm leh theih nan MNF chuan sorkarna an chan leh veleh nasa takin hma an la dawn niin a sawi bawk.