Chakma leh Bru chungchangah ZEM-in an ngaihdan an puang

Zoram Exodus Move­ment (ZEM) Executive Committee member-te July 27, Ningani zana ṭhukhawm chuan thu­chhuah an siam a; Chakma, kum 1950 hma lama Mizorama awm tawhte leh an thlahte chu Mizoram mi dik tak an ni a, kum 1950 hnu lama awm ṭante erawh chu Mizoram mi an ni loah an ngaih thu an tarlang.

ZEM thuchhuah chuan, "Indian Citizen­ship Act 1955-in a tarlan angin, kum 1950 hma lama chhungkuaa lo awm nghet tawh Chakma-te leh an thlahte Mizorama cheng chhunzawmte chu India khua leh tui dik tak an ni a, India khua leh tuite chanvo an chang ngei tur a ni," an ti.

Chutih rualin, kum 1950 hnu lama Mizoram páwn aṭanga Mizorama pém lutte leh an thlahte chu India khua leh tui an ni lo tih sawiin, "Dan bawhchhiaa lo lut, foreigner dik tak an ni a, India ram aṭangin an chhuak tur a ni," an ti a; eng vang pawha an chhuak thei lo a nih chuan, raltlan (refugee)-a chhiar tur an ni a, sorkar laipuiin a enkawl mai tura an ngaih thu an sawi.

Bru chungchangah ZEM chuan, "Bru chhung­kaw ṭhahnem tak, mahni duh thu ngeia Mizo­ram chhuahsante hi sorkar laipui leh Mizoram sorkar leh tlawmngai pawl hrang hrangte'n Mizorama hruai kîr tumin vawi duai lo an lo thawk tawh a, a tawk thawkhat ta hle. Tun aṭang chuan Bru hnamte hruai kîr tur emaw, ram páwna awm hmuna vote neihtir turin emaw ruahmanna siam tawh loh ni se. Mizoram mi dik takte chu an duh hun huna an lo kir hun nghah hi a tâwk viau tawh a ni," an ti bawk.