World Hepatitis Day hman a ni

Nimin khan IPR audi­torium-ah Mizoram State Network of Positive People (MISNOPP) leh Mizoram Hepatitis Response Team (MIHRET) buatsaihin World Hepatitis Day hman a ni a; Health minister Lal Thanzara chu khuallian niin, MSACS project direc­tor Dr Lalmalsawmi Sailo chu khualzahawm a ni.

Health Minister chuan, Hepatits natna chu Mizote zingah hriat lâr pawl a ni a, India ram chu khawvelah Hepatitis vei tamna ram 10 zingah a tel thu a sawi a; Hepatitis chu tihdam theih natna a ni tih mipuiin an hriat a ṭul tih sawiin, "Hepatitis enkawl hi a hautak avangin Mizo­ram Health Care Scheme-a in register-te tan Aizawl Civil Hospital-ah RKS fund kaltlangin February 6, 2017 aṭangin a thlawnin damdawi pek a ni," a ti.

Health Care Scheme leh RSBY hnuai­ah mi 331-in Hepati­tis-C enkawlna a thlâwna an dawn tawh thu sawiin Lal Thanzara chuan, "India ram hmarchhakah chuan hetiang ti hmasa ber kan ni," a ti.

Hepatitis-B veite'n Aizawl Civil Hospi­tal (ACH)-ah vaccine tláwm zawka an lak theihna March 16, 2017-ah siam a ni a, mi 25 hnenah pek a nih tawh thu a sawi bawk.

Dr Lalmalsawmi Sailo chuan, World Hepa­titis Day-in a tum ber chu, Hepatits natna chungchang mipui zirtir leh hriattir a nih thu a sawi a, "Mizoram chu mipui tam zawnga chhûtin Hepatitis vei tam zinga mi kan ni. He natna hi kan nun dan nena inzawm a ni a, inveng tur chuan taksa vawng thianghlim a ngai," a ti.

ACH Medicine HoD Dr Zo­than­tluanga'n Hepatitis chungchang a sawifiah a, Dr RL Sanghluna, Synod Hospital-in Hepa­titis chungchanga Mizo­ram dinhmun a sawi a, Mizoram Health Care Society CEO Dr Biakthan­sangi'n Hepatitis enkawl dan tur leh hmachhawpte a sawi thung.

Kumina World Hepa­titis Day thupui chu 'Eli­minate Hepatitis' tih a ni a; nimina a hmannaah hian MSACS, Social Welfare department, Mizoram Health Care Society, MISNOPP, MIHRET, tlawmngai pawl te, home leh centre hrang hranga thawktute an tel a ni.

World Hepatitis Day pual hian SHALOM chuan nimin khan Aizawl Press Club-ah thuthar thehdarh­tute an kâwm a; ruihhloa inchiu ṭhin, injecting drug user (IDU) zingah hun rei tak rawngbawlna an neih tawh ṭhin thu an sawi.

SHALOM director Dr Chawnglungmuana sawi danin, IDU pantute chu Hepatitis-C an vei leh vei loh endik a ni a, vei an tam hle.

July 2017 thlenga an hmuhchhuah dan chu, IDU client register mi mipa 1,388 leh hmeichhia 256, an vaiin mi 1,644 an ni a; HIV test mi 1,007-ah HIV hrik pai mi 483 (47.9 %) hmuh chhuah niin, Hepatitis-C test mi 846 zingah mi 742 (87.7%) hmuchhuah an ni.