MLPC Act vangin Congress MLA-te'n Kohhran pawi an sawi ka hre lo - Hawla

MPCC president Lal Thanhawla, chief minister chuan, Assembly House-a Mizoram Liquor (Control & Prohibition) Act sawihonaah Congress party MLA-te'n kohhhran pawi an sawi àwm a hriat loh thu a sawi.

Lal Thanhawla hian nimin khan Congress Bhavan-ah thu sawiin, an party MLA aṭangin kohhran hrang hranga mite'n MLPC Act sawihonaah thu an sawi tih a sawi a, "Kohhran pawi an sawi âwm ka hre lo. Kohhran ṭhenkhatin an lo la bing hi mak ka ti. Tu kohhran mah an sawi lang lo. House record aṭanga tihbo tur a awm ka hre lo," a ti.

MLA zingah kohhran pawi sawi an lo awm chuan a tuartu tur chu anmahni a nih thu sawiin MPCC President chuan, "Kohhran pawi sawi an awm a, hrem loh an nih duh tan chuan ṭawngṭaisak a, ngaihdam dilsak turah ka ngai," a ti a; ṭawngṭai sak loa insawichhiat ringawt chu mak a tih thu a sawi.

Lal Thanhawla chuan, pulpit aṭanga politics chhe lailet dêr leh politician-te ram tichhetua puh an awm chuan pawi a ti hle tih sawiin, "Politics tel lo chuan khawvel a kal dawn chuang lo. A chhunga kan awm a nih chuan politics inlumlet hian kan thlarau nun thlengin a ngawng a ni," a ti.

Politician-te páwng sawisel vek ngawt chu ṭha a tih loh thu sawiin MPCC President chuan, "Politician, ram tichhiate chu an hminghmerhin sawi mai se. A páwng a puia ram tichhetua inpuh ngawt hi a dik em aw?" a ti a; politics tel lo chuan hmasawnna hmuh theih a ni lo niin a sawi.