Kolasib-ah pawngsual duh loin kawng zawh Hnam dangte páwnchhuak lo tura tih an ni

Kolasib-a sikul pakhata zirlai hmeichhe tleirawl pakhat chu July 27, Ningani tlai khan a sikul báng haw kawngah David Kondo (29) s/o Saisani, Hmarkhawlien, Pailapul, Cachar district, Assam-in a pawngsuala hriat a ni. Hei vang hian nimin khan zirlaite'n Kolasib-ah kawng an zawh a, hnam dang (vai)-te páwna chhuak lo turin an ti bawk.

Kolasib-a chanchinbumite hnen aṭanga thu dawn danin, David Kondo hian hmeichhe tleirawl hi kawnga a kal lai kawng sîrah pawtin a pawngsuala hriat a ni a; a pawngsual tih hriat a nih velah mipuiin ûmzuiin an man a, Kolasib Police Station-ah hruai a ni. Ningani tlai vek khan police-in Kolasib District Jail-ah an dah nghal.

Pawngsualtua puh hi Adhivasi hnam a ni a, Kolasib-a cement mistiri helper ṭhin a ni. Mipuiin an man hnu hian kut a tuar nuala sawi a ni a; police-in an laka jail-a dah a nih hnuah Kolasib-a doctor-te'n medical exam an ti a; police-te'n thu an zawtfiah bawk.

Kolasib-a MZP leh MSU-te chuan Ningani zan khan thuchhuah siam nghalin, Kolasib-a hnam dangte chu nimin aṭanga Pathianni zan dar 12 thleng páwna chhuak vâk lo turin an hriattir a; hei hian zawm a hlawh hle a, nimin khan khawlaiah hnam dang (vai) hmuh an awm lo niin an sawi.

An zirlaipui pawngsual an demzia lantir nan zirlaite'n nimin chawhma khan Kolasib khawpui chhungah ngawi rengin kawng an zawh a, Diakkawnah kawngzawh titâwpin, ṭawngṭai rualin hun an khâr a ni.

Zirlai hmeichhe pawngsual chungchangah hian MHIP general headquarters chuan nimin khan thuchhuah siamin, David Kondo-a'n Mizo hmeichhe tleirawl a pawngsual chu an dem tak zet thu an tarlang a; "Kan ram chhung ngeia hnam dang miin pawi a khawih hi hriat-thiam har kan ti hle a, a phû tâwk hremna pe ngei turin thuneitute kan phût a ni," an ti.