Zawrh turin Samthang zîkhlûm vailiam

Samthang khaw mipuiin fûr laia thar chi zîkhlûm an thar chhuahte chu Mizoram hmun hrang hranga zawrh turin July 27, Ningani khan Horticulture deputy director Vanlalruata Chenkual-in a vailiam.

Vanlalruata Chenkual chuan, zikhlum chin chu kut hnathawktute tan eizawnna tling, thlai dang nena chin pawlh leh chin chhunzawm rem tak a nih thu a sawi a; India scientist-te'n fûr tomato an siam chhuak tawh a, zikhlum nen pawh chin kawp theih chi a nih thu a sawi bawk.

Sorkar thuchhuah tarlan danin, Samthang khuain zikhlum an chìn hi Horticulture department-in Mission for Integrated Development of Horticulture (MIDH) leh NEDP hnuaia an chìntir a ni a; tunlai hi a thar vanglai niin, Horticulture department-in a chìntir zingah Samthang khua hi thar ṭha ber an ni.

Samthang hian kum 2016 khan zikhlum quintal 1,260 an thar a, kumin-ah qtl. 1,072 a hralh tawh a, an la seng mek zel avangin kumina an thar zat chu qtl. 2,500 chuang a tlin beisei a ni. Zîkhlum chinnaah samṭawk an chíng tel bawk a, nikumah samṭawk qtl. 588 an thar a, kuminah nikum aia qtl. 100 vela tam an thar beisei a ni bawk.