Sorkar building-a AMC property tax Chawi ṭhin UDPA-in tihtawp ṭha a ti

Urban Development and Poverty Alleviation department (UDPA) Consultative Committee chu nimin khan UDPA minister Zodintluanga hoin a pisaah an ṭhukhawm a; sorkar building-te'n Aizawl Municipal Corporation (AMC) property tax an pek ṭhin leh sorkar lirthei parking fee chawi-tir tihtawp ṭha an ti.

Zodintluanga chuan, department kaihhnawih thutlukna khirh leh pawi-mawh siam a ngaih chang apiangin Consultative Committee member-te'n uluk taka an ngaihtuahna sêngin an finchhuah ṭhin tih sawiin, "Meeting thu-tlukna hian Mizoram tan thil ṭha tam tak a thawk thei a ni," a ti.

Meeting-ah hian AMC property tax, AMC councillor-te hlawh leh lawmman chungchang te, AMC account audit, Local Body Ombudsman chungchangte pawh sawiho a ni.

Meeting-a tarlan dan-in, local council leh village council-te'n lungawi lohna leh vuivaina an neih apiang an thlen theihna, Local Body Ombudsman chu The Mizoram (Establishment of Independent Local Body) Ombudsman Act, 2011 (Annexure-E) hmanga din a ni tawh.

Amaherawhchu, Ombudsman leh a puitu tur thawktute post chu dan ang taka siam a la nih loh avangin Ombudsman hian SAD hnuaia Consultant post angin hlawh a la a ni.

Meeting-ah hian MLA pathum - Lalrinliana Sailo, Lalruatkima, Chalrosanga Ralte bakah, member-secretary Dr C Vanlalramsanga leh Parliamentary Affairs secretary Marli Vankung te an tel.