Kum 2018-ah kan sorkar dawn - BJP GS

29th July, 2017

BJP (Central) gene-ral secretary Arun Singh chuan, kum 2018-a Mizoram MLA inthlan lo awm turah an party-in sorkarna an siam ngei dawn niin a sawi.

Arun Singh hian nimin khan Aijal Club-ah thuthar thehdarhtute a kâwm a; Mizorama Congress kaihhruai sorkar hnuaiah hnathawh tur ngaihthah a nia sawiin, "Hriselna lam a chhia a, kawng a chhia a, corruption a hluar si. Mipuiin Congress sorkar an ning a, BJP sorkar an duh tawh a ni. Sor-karna kan siam hunah chuan Central-in a ṭul ang zawng zawng kan ngaihtuah ang," a ti.

BJP hruaitute Mizoramah theihtawp chhuah-a an campaign dawn thu sawiin BJP GS chuan, "Mizoram hmun hrang hrang tlawhin, mipuite nen kan inkâwm ang a, sorkarna kan siam ngei ngei dawn a ni," a ti a; sorkarna chang ngei dawn mah se, seat an lak tur zat erawh a la sawi theih loh thu a sawi.

Arun Singh chuan, mahnia sorkarna siam an duh ber tih sawiin, "Regional party-te nena thawhho leh thawhho loh chu inthlan dawnah a chiang ang. Manipur-ah pawh inthlan hnuhnung ber hmain MLA kan nei lo a, sorkarna kan siam thei a ni. Hetiang hi Mizoramah pawh a thleng ve ang," a ti.

Arun Singh sawi dan-in, Mizoram chu facility lamah a hniam hle a, state dangte chuan hma an sawn telh telh a ni. Mizoram a hniam bik chhan chu Central aṭanga sum an hmuhte an hman ṭhat tâwk loh vang a ni. Sorkar laipuiin fund a pe chhuak zel dawn a, chutih rual chuan, state sorkarte chu sumte hmang ṭha turin sorkar laipuiin a beisei a ni.

Zawhna chhangin Arun Singh chuan, an party constitution-ah hnam leh sakhua intluktlanna an ziah lan thu sawiin, "Eng sakhua pawh BJP-ah hian an leng vek. Mirethei chawikan hi kan duh ber a ni a, kan scheme kan kalpuina reng rengah sakhua, hnam in-thliar hranna kan nei lo. Goa-a BJP member tam ber chu Kristian an ni a, sorkarna kan siam a ni," a ti.

BJP chu khawvela party member ngah ber a nih thu sawiin BJP GS chuan, "India ramah MLA leh MP ngah ber kan ni a, tunah hian state 18-ah sorkarna kan siam mek a ni," a ti a; Mizo mipuite a kawm kualnaah BJP sorkar hnuaiah awm an duha a hriat thu a sawi.