Mizo maxicab leh bus-te'n Lungawi lohna lantir

Silchar mi pakhatin Kolasib leh Silchar inkara Mizo maxicab tlânte a tih-buai ṭhin vanga lungawi loh lantir nan nimin aṭang khan Mizo maxicab-te chu Kolasib leh Silchar inkarah an tlan duh lo.

Kolasib aṭanga thu dawn danin, Kolasib leh Silchar inkara maxicab pa-hnih leh bus service tirtu Das-a, Silchar chuan Mizo maxicab leh bus-te vawi tam tak a tibuai a, police-ah leh Dholai checkgate-ahte a hék ṭhin a; Ningani pawh khan Kolasib aṭanga mini bus service pakhat chu dâwta hêkin, Mizorama bungraw lut turte Assam police-te a hrèntir a ni.

Mizo maxicab leh bus enkawltute chuan Assam police-in bungrua an hrènte thu delhkilh awm loa an chhuah hma loh chuan Kolasib leh Silchar inkarah tlan an tum rih lo a; Das-a maxicab pahnih leh bus pakhat, Kolasib-a awm mek pawh Kolasib chhuahsan rih lo turin an dang a ni.

Hetih lai hian, Das-a hi Mizoram aṭanga passenger kalte Silchar-a phur ṭhintu auto-rickshaw driver-te chuan nimin khan an luhchilh a, a bungraw mantirte police station aṭanga la chhuak turin an hriattir a, Das-a pawhin nimin khan police station aṭangin bungruate chu a la chhuak nghal. Hei vang hian Mizo maxicab leh bus-te chu vawiinah an tlan ṭan leh nghal dawn nia thu dawn a ni.