KHAWTHLIR

Inkhârkhip kalpui chhunga mipui himna tura sorkarin a duan 'Ordinance for Containment and Prevention of Covid-19' chu Cabinet-in a pawm hnuah nimin khan gazette a tih chhuah a ni. Containment and Prevention of Covid-19 ah hian Covid-19 laka mipuite an him theihna atana zawm tur, dan zawm lote hremna, a hrem theih dan leh a hrem theitute tarlan a ni. He dan hi vawiin aṭanga hman ṭan tur a ni.

Aizawl District Magistrate chuan May 2, Inrinni khan thupek chhuahin, Aizawl district-ah Covid-19 laka mipui an him zawk nan páwna chhuakvâk tur reng rengin hmai tuamna hman vek tur a nih thu a puang a; vantlang hmun leh dawra kalte chu metre khat tala inhlata awm tur a nih thu a tarlang bawk. Thupek zâwm lote chu hrem theih an ni.

May 2, Inrinni khan Lairam Isua Krista Baptist Kohhran (LIKBK) Ṭhalai Pawl, Lawngtlai Vengpui bial leh Bazar bialte'n Lawngtlai District Hospital-ah thisen unit 50 an pe a, petute mipa 33 leh hmeichhia 17 an ni. Tuithiang Branch KṬP pawhin Synod Hospital-ah thisen unit 33 an pe a, petute mipa 27 leh hmeichhia paruk an ni a; individual donor pathum an awm bawk.

Serchhip Vegetable Growers’ Association chuan May 2, Inrinni khan Vegetables & Fruits Supply Chain hnenah zîkhlûm quintal 14.04 a thlâwnin an pe a; Ai­zawla home hrang hrang paruk - Ṭawngṭai Bethel Camping Centre, TNT, Hermon Children’s Home, Operation Kingdom Ministry, Gan Sabra leh Peace Home-ahte sem a ni.

UDPA department hmalaknain Champhaia DAY-NULM chuan task force-te nen ṭanghoin Champhaia mi harsa zual chhawmdawl ngai mi 300 hnenah ṭanpuina an sem. Champhai bakah, Biatea chhungkaw 30 leh Khawhaia chhungkaw 20 hnenah pek a ni bawk.

Lunglei North bialtu MLA Dr Vanlalṭanpuia, Mizoram Youth Commission (MYC) chairman chuan May 2, Inrinni khan Lunglei Zohnuaia digital planetarium leh science center sakna hmun tur a tlawh.