Mizoram quota Category I-ah 1997-2014 ah Chakma 34 an lut

Kum 1997 aṭanga kum 2014 thleng khan Mizoram quota-a category-I hnuaiah technical course hrang hrangah Chakma zirlai 34 an lut.

Mizoram quota-a Chakma zirlai lutte hi an zirna hmun hming leh an thil zir hming chhinchhiah vek ni mah se, kum 1997 hma lama technical course chi hrang hrang zir an awm leh awm loh chu Higher & Technical Education (HTE) department leh a hnuaia Technical Wing-in record hlui an hmu zo lo. HTE department hotute chuan, kum 1997 hma lamah chuan technical course-te chu a kaihhnawih department-in an buaipui ṭhin nia an hriat thu an sawi.

Mizoram quota-a technical course zir zingah kum 1997-ah Chakma zirlai pakhat a awm a, a hnu lamah pawh an tel ve zel.

Kum 2014 khan category I-ah Chakma zirlai panga an awm a, chu'ng mite chuan MZP-in an dodal hmain an zirna tur an pan hman. 2014 veka BDS zir tur Chakma zirlai pakhat chu a kal tlai avangin MZP-in a kal hmain an hre chhuak hman a, an dodal nghal a; MZP hruaitute pawh man niin, Central Jail-ah dah an ni.

Kum 1997-2014 chhunga category I-a Chakma zirlai dahte chu kum 2012 aṭangin an address chiang taka chhinchhiah ṭan a ni a, a hma kuma mite chu an hming leh an pate hming bâk ziah a ni lo

Mizoram quota-a zir tur thlanna, State technical Entrance Examination-ah hian kum 1998, 2001, 2002, 2005, 2006 leh 2007-ahte Chakma an lang lo a, kum dang zawngah chuan langin, category I-ah dah an ni.

HTE (Technical Wing) hotute sawi danin, seat insem danah 'The Mizoram Selection of Candidate for Higher Technical Course, Rules 1999-ah seat awm zawng zawng (100%) chu category-I-ah dah a ni a; category-I a mite'n course awmte an hnawhkhah loh chuan category II leh III-a mite'n an thlang ve ṭhin.

Hei hi kum 2002 khan Silchar-a mi pakhatin Gauhati High Court-ah a khing a; High Court chuan Mizoram sorkar chu seat hauh dan tidanglam turin a hriattir. Court thupek angin Mizoram sorkarin category I-ah 85%, II-ah 10% leh III-ah 5% a dah ta a ni.

Kum 2014-a category I-ah Chakma zirlaite dah an nih vanga zirlai pawlte'n an dodal hnuah sorkarin 'The Mizoram Selection of Candidate for Higher Technical Course, Rules 2016' a siam a; seat awm zawng zawng aṭanga 95% chu category I-ah dah niin, category II-ah 4% leh category III-ah 1% dah a ni.

Technical course zir turte tan counselling pawimawhzia sawiin, HTE (Technical Wing) hotute chuan, "Counselling-ah hian an zirna tur hmun leh an zir tur an thlang ṭhin a, kal lote chuan an chance an hloh tihna a ni," an ti.

Technical Wing hotute sawi danin, counselling-ah hian a tirah a sang zual 100 an ko a, seat awm dan an hrilh a, sum sen ngai zat leh an awm zel dan turte an hrilh ṭhin a, a ti ṭha zual 100 chinte chu an buai vak ngai lo. A hnuah 101-200 inkarte counselling tihpui leh an ni.

Chakma-te chungchangah hian MZP general secretary L Ramdinliana Renthlei chuan, "A sang chin zir thei ngaimawh tham an awm ngai lo a, B.Sc. (Nursing) leh laboratory technician-te an zir ṭhin. Kan lo han en reng thei lo a, complaint a awm ngai lo bawk a, hei vang hian hma kan la lo a ni," a ti.