Union Minister-in Larsap leh CM a kâwm

Zan khat riaka Mizo­rama rawn zin, Union mi­nister of state for Consu­mer Affairs, Food & Public Distribution CR Chaudhary chuan July 28, Zirtawpni tlai leh zan khan Governor Lt. Gen. Nirbhay Sharma leh chief minister Lal Thanhawla te a kâwm.

Raj Bhavan-a Go­vernor nen an inkawmnaah National Food Security Act hlen tura harsatna hrang hrang awmte an sawiho a; internet ṭha zawk a awm chuan, ration card digitisation chu chak zawka kalpui theih a nih thu te, thlai tharte vawn ṭhatna tur, cold chain management chuangchang an sawi a ni.

Larsap chuan, Mizo­ram chu sorkar inrel­bawlnaah hmarchhak biala a ṭha ber zinga mi a nih thu sawiin, inkalpawhna kawngpui leh rel kawng sial mek a nih avangin ei leh barah hmasawnna tur tam tak a awm thu a sawi a; hmarchhak mite nunphung leh hnam ziaráng chu India ram hmun danga mite nen a inan loh avangin sorkar laipui pawhin hriatthiamna thui tak a neih ṭha a tih thu a sawi bawk.

Union Minister leh Governor inkawmnaah hian Food, Civil Cupplies and Consumer Affairs (FCSCA) changtu par­liamentary secretary TT Zothansanga, FCSCA de­partment hotute leh Food Corporation of India (FCI) hotute pawh an tel a ni.

Chief Minister banglaa CM Lal Thanhawla nen an inkawmnaah FCSCA kudam, kawngpui leh FCSCA department kaihhnawih hrang hrangte an sawi dun.

Lal Thanhawla chuan, CR Chaudhary chu Mizo­ram sorkar hma­lakna hrang hrang te, interna­tional border a nih ang Mizoram pawi­mawhna leh ngaihsak hlawh a ṭul biknate a hrilh. Union Mi­nister leh Chief Minister inkawmnaah hian FCSCA minister John Ro­tluangliana pawh a tel.

Union minister CR Chaudhary hian Aizawla a chàm chhungin BJP, Mizoram Pradesh pisa pawh a tlawh a; July 29, Inrinni khan Mizoram a chhuahsan a ni.