CYMA-in ṬBCC an tlawh

YMA Central Executive Committee (CEC) member ṭhenkhatte chuan July 29, Inrinni khan Ṭawngṭai Bethel Camping Centre (TBCC), Chawnpui an tlawh. ṬBCC hotupa TT Zohmingthanga chuan, an kalphungah dik lo a awm thu leh insiamṭhatna tur tam tak an neih thu a sawi.

Central YMA hruaitute hian ṬBCC hmunhma hrang hrangte tlawhin, a din­­hmun an enfiah. Tui tam zawk an dah khawlna tur te, tui tihthianghlimna tur leh taksa sawizawina hmanrua leh hmunhma an mamawh dante leh hriselna lama ṭha zawka an inenkawl dan turte an enfiah a ni.

An thil hmuhte chu CEC ṭhutkhawm hunah an sawiho ang a, CYMA-in a ṭul anga a bawhzui tur thu an sawi.

An inkawmnaah TT Zohmingthanga chuan, an centre chungchanga mipuiin thil tam tak an sawi zingah dik tâwk lo awm mah se, a dik tam tak a awm thu a sawi a, "Insiamṭhatna tur tam tak kan nei a ni," a ti.

ṬBCC hi tun hnaiah nasa taka sawiselna a awm hnuah mi 354 an inla chhuak tawh a; chutih rualin, inla chhuak zinga ṭhenkhat chuan luh leh an dil a, mahse, a enkawltute lamin an la luhtir ngam hrih lo. Hetih lai hian, mi thar pahnih indah lut an awm thung.