KHAWTHLIR

TKP Day hmang
Nimin, Pathianni kha Mizoram Baptist Kohhrana Ṭhalai Kristian Pawl (ṬKP) din champha, a kum 66-na a ni a, ṬKP unit hrang hrangte'n he ni pual hian hun an hmang. ṬKP hi July 30, 1951-ah Serkawn, Lungleia ṭhalai rualte leh kohhran upate'n Zosapte kaihhruaina hnuaiah an din a ni. ṬKP Day hi October 22 ah hman ṭhin a ni a, kum 1995-a Sethlun-a MṬKP Rorel chuan July 30 hi ṬKP Day-ah hman ni tawh se a ti a, kum 1997 aṭang khan July 30-ah hman ṭan a ni.

TBCC thlawp
Chanmari Branch YMA chuan Inrinni khan Ṭawngtai Camping Bethel Camping Centre (TBCC) chungchangah thuchhuah siamin, TBCC chu Chanmari YMA leh YMA branch hrang hrangin ṭangkai taka an hman tawh ṭhin thu an tarlang a; ṬBCC chuan dem leh sawisel hlawh nasa chu pawi an tih thu an sawi rualin, Chanmari YMA chuan ṬBCC rawngbawlna an thlawp tlat thu leh, ṭangkai zawka rawng an bâwl zel an duhsak thu an sawi a ni.

Mistiri hnatlang
Khawzawla Mizoram Mistiri Association chuan July 29, Inrinni khan an din champha vawi 10-na pualin Mualvawm khelmual pavillion bang leh a chung an siam ṭhain an hnatlang a, mi 20 an thawk chhuak. Pavillion siamna tur hmanrua hi Khawzawl BDO-in a tumsak a ni.

Thisen pe
ṬKP Coordination Committee, Aizawl chuan Inrinni khan BCM City Church kohhran hall-ah blood donation camp an huaihawt a, Mission Vengthlang, Republic Veng leh Republic Vengthlang biala ṬKP member mipa 122 leh hmeichhia 37-te'n Aizawl Civil Hospital tan thisen unit 159-an pe. Siaha West Bial ṬKP-in ṬKP Day pualin Siaha District Hospital-ah thisen unit 21 an pe a, Phunchawng Branch KṬP-in Synod Hospital tan unit 11 an pe bawk.

Freshers' social
Siaha College chuan July 28, Zirtawpni khan Khaihra Hall-ah an college-a zirlai lut tharte pualin fresher's social an hmang a; an principal Dr Chawngkhuma Chawngthu chuan, zirlaite chu zirna ngai pawimawh ber tur leh thiamna tak tak puak chhuah tum a, lehkha zir turin a fuih.