BJP kaihhruai sorkarah India ramin Hma a sawn nasa hle - CR Choudhury

Union minister of state for Consumer Affairs, Food & Public Distribution Chhotu Ram Chaudhary chuan Inrinni zing khan BJP, Mizoram Pradesh pisa a tlawh a, Mizorama BJP hotute leh party worker-te nen an inkâwm a; BJP kaihhruai sorkarah India ramin hma a sawn nasa hle niin a sawi.

CR Choudhury chuan, prime minister Narendra Modi kaihhruaina hnuaiah India ramin hma a sawn hle nia sawiin, "Mipui tan scheme tam tak duan thar a ni," a ti a; BJP chu political party ringawt a ni lo a, chhungkua an nih thu a sawi.

Sorkar laipui scheme-te chu Mizoramah kalpui a nih dan a hre mai lo tih sawiin CR Choudhury chuan, "Mipuite'n in dawn tur in dawng em? In hmuh tur in hmu em? In chan tur in chang lo emaw harsatna emaw in neih chuan ka hnenah rawn thlen ula, ka department chan a nih chiah loh pawhin a ti theitu hnenah ka lo thlensak zel ang che u," a ti.

CR Choudhury chuan, a department chan hnuaia Mizorama hmalakna thar tur hrang hrang sawifiahin, chu'ng hmalakna awm turte chu dik tak leh ṭha taka kalpui a nih theih nan BJP Mizoram Pradesh chu lo enpui turin a chah a, "In duh dan hi keini chuan kan dah lal ber zel ang," a ti.

Mizoram BJP hruaitute chuan Union Minister hnenah hian Mizoram mamawh hrang hrang an lo thlen a; Food Corporation of India (FCI) kudam sawn chhuah thuai a ṭul thu te, FCI hnuaia National Board member-ah Mizo pahnih tal dah a ṭul thu te, Mizorama ration buhfai sem chhe lutuk chungchangte an lo thlen a ni.