END-in zu bilhna hmun an tichhia
Excise & Narcotics department (END) enforcement-te chuan tunlai hian Aizawl leh a chhehvelah MLPC Act, 2014 kalha zu in, kawl leh siamte dap beihpui an thlak mek a; July 28, Zirtawpni khan nilengin Phunchawng leh Rangvamual vel dapin, zu leh zu bilhna hmanrua eng emaw zat an man.
July 28-a Phunchawng leh Rangvamual an dapnaah hian END-te hian zu bilh lai ṭín 1,015 an tichhia a, rakzu litre 168 an man bakah, chu'nga inhnamhnawih mi pathum an man a; zu siamna hmun eng emaw zat an tichhe bawk.
END PRO tarlan danin, tunlai hian END-in Aizawl khawpui kawtchhuah hrang hrang hmun paliah lirthei lut leh chhuak khalhtute'n zu an in leh in loh an endik ṭhin a; khualzin phur lirthei - maxicab leh taxi driver-te pawh an stand-ah kalin, breath analyser hmangin an enfiah ṭhin.
END chuan, beihpui an thlakah hian MLPC Act bawhchhia man tur an awm zeuh zeuh rualin, mi tam zawkin MLPC Act chu an zawm niin an tarlang.