Kolkata Mizoram House-a Mizo 18 Quarantine centre-ah dah luh an ni

AMRI Hospital, Kolkata-a Mizo damlo awm zinga pahnihin Covid-19 an vei tih hmuh chhuah a nih hnuah, Salt Lake Mizoram House-a awm mek Mizo 18 leh thawktu hnam dang pakhat chu quarantine centre-ah dah hran nghal an ni.

Health minister Dr R Lalthangliana chuan West Bengal chief minister Mamata Banerjee hnenah lehkha a thawn a, Mizote chu Kolkata-a inentir an kal nasat thu thlenin, "Mizoram aṭanga inenkawl tura kalte hian damdawi-in leh Mizoram House an kar tawn ṭhin. AMRI Hospital-a damlo kai hmuh­chhuah a ni a, Covid-19 kai hmuhchhuahte'n an kaichhawn theih tur angte dahhran thuai an nih theihna atan leh test thuai an nih theihna atan hma la turin ka ngen a che. Tin, damdawi-ina Mizo damlo dangte leh Mizoram House-a awmte Covid-19 laka an him theihna atan hma min laksak turin ka ngen bawk a che," a ti.

Sorkar thuchhuah tarlan danin, Covid-19 vei Mizo damlo pahnihte chu Covid-19 vei dahna tur bika ruatah enkawl nghal an ni a, an kalna leh anmahni hnaihtu zawn (contact tracing) zui a ni. Mizoram House, Salt Lake-a awm mi 18 chu May 1, Zirtawpni zan dar 9 khan quarantine centre-ah dah an ni a; Mizoram House-a thawk hnam dang pakhat pawh Inrinni khan quarantine centre-ah dah luh leh a ni bawk.

Health minister Dr R Lalthangliana chuan May 2, Inrinni chawhnu khan West Bengal sorkara Health & Family Welfare minister Chandrima Bhattacharya a bia a, AMRI Hospital, Kolkata-a Mizo cancer vei damlo, Covid-19 kai pahnih an buaipuinaah lawm­thu a hrilh. Covid-19 vanga West Bengal-a Mizote'n harsatna dang an tâwk leh a nih pawha theihtawp chhuaha ṭan lakpui zel turin a ngen a; Chandrima Bhattacharya pawhin, theihtawp an lo chhuah zel tur thu a lo hrilh.

AMRI Hospital-a awm Mizo cancer vei pahnihin Covid-19 natna an kai a ni tih hriat a nih veleh Dr R Lalthangliana chuan West Bengal Health Minister a be nghal a; a ngenna angin West Bengal Health Minister chuan doctor thiam bik pakhat Mizoram House, Salt Lake-ah a tír nghal a, Mizoram House joint resident commissioner Jacob Lalawmpuia hoin hma an la a ni.

Dr R Lalthangliana chuan, Kolkata-ah Covid-19 vei Mizo hmuh chhuah chu pa­hnih chiah an la awm thu leh thuthang dik lo vanga chî-âi lo turin mipui a chah a; Inrinnia cancer vei pakhat dang Covid-19 vei hmuh belh a awm anga sawi chu thu dik lo a ni tih a sawi bawk.