Mipui tawrh hrep hnua kawng siam tum hi vote zawnna chi a ni lo - MNF Vice President

MNF party chuan Inrinni khan Ṭhuampui YMA Hall-ah Aizawl East-I bial chhunga unit hrang hrang pualin SEDP training an buatsaih a; an hun hmanpuitu, MNF vice president Dr R Lalthang-liana chuan, "Mipui tawrh hrep hnua kawng siam tum hi vote zawn nana hman chi a ni lo," a ti.

Dr R Lalthangliana chuan, Mizo mipuiin ni tina an thu thar an hriat chu Zoram dung leh vânga kawngpui chhe lutuk chanchin te, zirtirtu indaih lo thâwm te, kawng hrang hranga harsatna leh manganna thleng ṭhin chanchinte a nih thu a sawi.

Mizoram pumah kawng ṭha a awm mang lo nia sawiin R Lalthang-liana chuan, "Congress sorkar hian kawng siam theih hun chhungin siam a tum lo a, vote zawn nana siam tumin budget-ah sum tam tak an dah. Chung lamin a remtihpui loh vang nge, khua a hul thei si lo a, kawng siam hi sorkarin a ngaihsak lo hrim hrim a ni. Mipui tawrh hrep hnua vote zawn nan chauha kawng siam tuma hmalak hi sor-kar ṭha zia a ni ngai lo," a ti.