Chalfilh Tourist Destination thubuai NGT thupek khinna Court-in a hnâwl

National Green Tribunal (NGT)-in Chalfilh tlanga tourist destination ṭhiat tura a tihna thupek Gauhati High Court-a khin lêtna public interest litigation (PIL) chu Gauhati High Court, Division Bench-in a hnâwl.

Chalfilh tlang tourist destination ṭhiat tura NGT thupek hi Mizoram sorkar chuan Supreme Court-ah an khing lêt a, chumi hnuah Khanpui & Lailak Village NGO Coordination Committee-in Gauhati High Court-ah PIL thehlutin an khing ve leh bawk.

Khanpui & Lailak Village NGO Coordination Committee chuan, Chalfilh Reserved Forest Notification chu an hriatpuina tel loa puan a nih bakah, final notification a la chhuah loh avang leh Chalfilh tlang chu a chhehvel khuate tan horticulture thil atan an mamawh avangin notification ṭhiat turin PIL an thehlut a ni.

Khanpui & Lailak Village NGO Coordination Committee PIL chu Justice Michael Zothankhuma leh Justice Marli Vankung ṭhutna Gauhati High Court Division Bench chuan August 24, 2022 khan a ngaihtuah a, PIL chu a hnâwl ta a ni.

Reserved forest atana Chalfilh tlang puanna tur hian July 13, 1976 khan preliminary notification tihchhuah a ni a, Forest department-in reserved forest tiin protected area-ah a khung zui a ni. Supreme Court-in December 12, 1996-a thupek a chhuahah state tinte chu an reserved forest leh dinhmun report tura a tih angin, Chalfilh Reserved Forest pawh reserved forest area zinga telh a ni. Sorkar laipuia EFCC Ministry-in India rama forest area a chhinchhiahna ENVIS Center-ah a chuang bawk.

Chalfilh tlangah hian Mizoram sorkar chuan kum 2000 hnu lamah Tourism Development Project a kalpui a, a panna kawng thar km. 10.5-a thui siam a nih bakah, in eng emaw zat sak a ni. Forest clearance awm loa hmalak a nih avangin Center for Environment Protection (CEP) chu NGT-ah an zualko a; NGT chuan Chalfilh tlanga in sak leh kawng siam tawhte chu ṭhiat vek turin Mizoram sorkar a hriattir a ni.