Revenue Minister phalna nei chauhin House pass dilna form an la thei

ZPM Ṭhalai hruaitute chuan, Land Revenue & Settlement (LRS) minister Lalruatkima chu in hmun (house pass) dilna form lei chungchangah dan ṭan chhan mumal awm si loa thuneihna inpeah an puh a, insawifiah turin an phût.

ZPM Ṭhalai hruaitute chuan nimin khan Aizawl Press Club-ah thuthar thehdarhtute an kâwm a; an general secretary J Lalramnghaka chuan, LRS Minister hriatpuina la pha chinte chauhin in hmun an dil thei tih sawiin, "Dan ṭan chhan mumal awm loa chetna a ni. MNF sorkarah dan hnuaia intluktlànna a bo tial tial a, thil ti thei leh thil ti thei lo inkar a zau tial tial niin a lang. MNF sorkar chu mipui sorkar a nih lohzia a tarlang chiang hle," a ti.

J Lalramnghaka chuan, LRS Minister phalna/hriatpuina neite chauhin in hmun dilna form an lei thei tih sawiin, "Revenue Minister kaltlang khera house pass dilna form lak chungchanga RTI Act hmanga zawhna LRS department-in an chhan danin, 'House pass dilna form, LRS department changtu Minister phalna khera lak chhuah (issue) a ngaih chhan hi The Mizoram (Land Revenue) Act and Rules, 2013 bung leh chángah tarlanna a awm lo,' tih a ni," a ti. LRS Minister phalna neite chauhin in hmun an dil thei chu mipui tan phurrit lian tak a nih thu leh intihlalna a nih thu a sawi.

Minister thil tih dan chuan in hmun pass dil duh mi tam takin harsatna an tawh phah tih sawiin Lalramnghaka chuan, intihlal duh luat vanga mipui tana phurrit siam tawh lo turin LRS minister Lalruatkima an phût tih a sawi a, "Dan ṭan chhan mumal awm si loa thuneihna a inpe chawp hi a chhan sawifiah ngei turin kan phût a, hlâwkna leh manṭang a tél ve zawk em ni, tih hi kan zawhna a ni," a ti.

ZPM Ṭhalai tarlan danin, LRS department-in RTI Act hmanga zawhna an chhannaah, 'He thil practise a nih chhan chu - thawktu indaih loh lutuk vang a ni. In hmun thar chu sawi loh, house pass issue tawh LSC-a convert dilna leh LSC partition, LSC correction dilna chauh pawh hi tuna surveyor awm sate hian an thawk sêng lo a, chu bakah, dispute case chinfel sên loh a awm bawk. Chuvangin, in hmun thar dilna hi chu khâr bur loin a mamawh tak tak chuan an mamawhnate sawiin a changtu Minister-ah dilna siamin Minister phalnaa issue ṭhin a ni. Minister phalna neite chu house pass dilna form hi pek chhuah tho a ni,' tih a ni.