Bawlhhlawh sâwngbàwlna aṭanga siam Leiṭha zawrh chhuahna dawr hawn a ni

Solid Waste Management Centre (SWMC), Tuiriala bawlhhlawh ṭawih thei hmanga leiṭha siamte zawrhna dâwr thar, Aizawl Municipal Corporation (AMC) building-a mi chu nimin khan Aizawl mayor Lalrinengsa Sailo-in a hawng. Mayor chuan, SWMC chu politics-a hamṭhatna atana hman tumna chi a nih loh thu a sawi.

Lalrinenga Sailo chuan, SWMC chuan tun hnaiah vei a hlawh thar nia sawiin, "Aizawl bawlhhlawhte hi SWMC hian a zo tawh lo a, ruahmanna thar a ngai tih a chiang. Politics-a hamṭhatna atana hman tum chi a ni lo. Mipui leh AMC-te ṭanrualna hun tur zawk a ni. AMC-in sum a ngah loh avangin sorkar ṭanpuina pawh kan mamawh zel dawn," a ti.

Bawlhhlawh lâk khawm dan tihchangtlun zel a nih dawn thu sawiin Mayor chuan, "Tuna harsatna awm pakhat chu, ṭawih thei zingah ṭawih thei lo a tam em em hi a ni. Hemi chinfelna atan hian stainless steel container eng emaw zat chah a ni a, ṭhenkhat a lo thleng tawh," a ti a; bawlhhlawh paih motor-ah container-te vuahin, ṭawih thei lo bikte chhùn khawm a nih dawn thu a sawi.

Aizawl Mayor chuan, SWMC chu January 2022 tàwp lamah AMC-in a lâk thu sawiin, "Kan lâk hlimchhàwn hian sum leh pai a ken tel loh avangin AMC suma enkawl a ni. Bul kan ṭan dawn chauh a ni a, kan ruahmanna hlawhtling a la tam lo. Chuti chungin bawlhhlawh hman nawn theihte sumah chantir ṭan a ni tawh a, kan lawm hle a ni," a ti.

AMC executive councillor (solid waste management) Laltlanzova Khiangte chuan, AMC councillor leh official-te municipal changtlung zawkte tih dan zir chianga an kal ṭhin thu sawiin, "Kan zirchianna aṭanga he hun hi thleng thei kan ni," a ti a; SWMC aṭanga leiṭha siam chhuah a ni ta chu AMC leh Aizawl tan ni chhinchhiah tlak nia a hriat thu a sawi.

Leiṭha siam chhuak tur hian AMC leh Waste Tech & Bio-Energy chuan thawh dunna thuthlung an siam a; tun dinhmunah chuan kg. 15 & 25 ip siam niin, kg. khat Rs 10 hisâpa hralh a ni.