Ram rorelna ṭha, mipui leh kohhran duh dan ang neih kan duh - Lalsawta

Mizoram Pradesh Congress Committee (MPCC) president chuan, Congress party chuan Mizoramah ram rorelna ṭha, mipui leh kohhran duh dan ang neih an duh thu leh Mizoram siamṭha turin an rilru leh ngaihtuahna a inpeih thu a sawi.

Aizawl South-II in nimina Thakthing Veng Zawlbuka Special Block Conference an neih a hmanpuinaah Lalsawta chuan, "Congress party hian ram rorelna ṭha, mipui leh kohhrante duh dan ang neih hi kan duh. Pathian min pek Mizoram hi ram dang aia chhia leh nêp a ni bik lo a, dinchhuahpui kan tum. Congress hruaitute chu minister leh MLA nih vanga sum ngah aia retheih thlang, mipui retheih leh harsatzia hriaa inpe turin kan inhlan mek a ni," a ti. 

Lalsawta chuan, MLA leh minister hlawh a tam tâwk tih sawiin, "Hei bak duh belhna rilru pu hi ram leh hnam hmelma a ni. Chawm bawk, háwp bawk lam a ni lo, rawngbawlna a ni," a ti a; loneitu, kut-hnathawk leh ṭhalaite tan eizawnna ngêlnghet buatsaihsak chu an ngaih pawimawh ber a nih tur thu a sawi.

Eizawnna ngêlnghet siamnaah environment leh mihring rilru leh nun tichhe lo zawnga hmalak a ngai tih sawiin Lalsawta chuan, "Hmasawnna hi thlentir angin hre mah ila, mihring rilru leh environment a chhiat si chuan hmasawnna tluantling a ni ngai lo. Sum awlsam leh thawk loa sum hmuh do tlat a ṭul a, sorkar sum hi mipui sum a ni a, a zahawm a, a enkawl pawh nasa taka zir ngai a ni," a ti.

MPCC President chuan, ram hruainaa ngaihtuahna danglam leh nghet nei ram hruaitu neih a pawimawh tih sawiin, "Chumi atan chuan kan ram siamṭha turin kan rilru leh ngaihtuahna a inpeih a, chumi atana thil hlanah kan inhlan a ni," a ti bawk.

Inkhawmpuiah hian MPCC general secretary Joseph Lalhimpuia leh John Siamkunga te, MPCC Upa Wing president Lt.Col. ZS Zuala te pawhin thu an sawi