Mizoram hi sorkar ṭha neih châkin a tuihâl - ZPM Working President

ZPM working president K Sapdanga chuan, politics a kal fuh loh chuan khaw kilkhâwr apiangin an tuar nasa ṭhin tih sawiin, Mizoram chu sorkar ṭha neih châkin a tuihâl tih a sawi.

ZPM Champhai South Block-in nimina Champhai Dinthar leh Zote-a inkhawm an buatsaihah thu sawiin K Sapdanga chuan, "Politics kal sual chu mi tinin kan tuar a, politics kal dik chu mi tinin kan chhawr. Politics a kal fuh loh chuan khaw kilkhâwr apiangin an tuar nasa ṭhin. MLA-a tlin te, minister nihte hi hlawhtlinna vàwrtàwpa ngaih chi a la ni lo a, mi hlawhtling ni tura dinhmun remchanga chuankai tihna mai a la ni," a ti.

K Sapdanga chuan, "Mi tinin kan hmuh leh hriat, kan phat theih miah loh chu kan ram hi sorkar ṭha neih châkin a tuihâl tih hi a ni a, mipui tuihâl chhan chu tui in tur ṭha an hmuh lohna a rei tawh tihna a ni. Kan ram tuihâlna tireh turin ZPM chuan sorkar kalphung thar a mamawh tih hi a auhla a ni," a ti a; chumi hlawhtlintir theitu chu mipui an nih thu a sawi.

ZPM Working President chuan, Mizo hnam chhuân la awm zel tur tana pawi khawih bànsan tawh turin thuneihna chang mekte an ngen tih sawiin, "Kan ram siamṭhat hna te, hnam tihhmingṭhat hnate hi ram hruaitute kutah chauh a awm lo a, kan zavaia kutah a awm. Hmun kilkhâwr ber aṭang pawhin mi tinin Mizoram siamṭhat hna kan thawk thei vek a ni," a ti a; mahni leh tu leh fate tan Mizoram tuihâlna tireh tura ngaihtuahna sêng turin mipui a sáwm.