Civil Hospital-a Zonunthari thih danah MSCW-in suo moto case an ziak lut

Mizoram State Commission for Women (MSCW) chuan mipain hmei­chhia a sawisa lai video August 15, 2022-a social media-a darh chungchanga suo moto hmanga thubuai an ziah luh hnuah, Zonunthari (35) w/o Isak Malsawmsanga, Hortoki thih danah suo moto hmang bawkin thubuai an ziak lut.

MSCW chuan August 25, 2022 khan order chhuahin, Civil Hospital, Aizawla Zonunthari thih dan chu an ngaih thutak hle thu leh suo moto case ziah luh a nih thu a tarlang a, "Hetianga Civil Hospital, Aizawla nau chunga thihna thleng a awm hi chhui chian ngai niin a hria a. Director, Hospital & Medical Education (HME) chu Suo Moto case no. 45/2022-ah hian opposite party no. 4-ah ziah luh a ni," a ti.

MSCW order-a a lan danin, HME Director chu Zonunthari thihna chungchanga an hmalak zui dan report felfai takin, order a hmuh aṭanga ni sarih chhungin ziaka MSCW-ah thehlut turin a hriattir a; nau chunga thihna a thlen tawh loh nan hmalakna tur awm ang angah chak zawka hma la turin thuneitu hrang hrangte beisei an ni. Thubuai hi chawlhkar khat hnuah ngaihtuah leh a ni ang.

Tarlan tawh angin, Zonunthari chu nau pai a nih avangin August 4, 2022-ah Civil Hospital, Aizawlah a inentir a, a pum a nat avangin August 17-ah kal lehin, admit a ni. A pum ná a zual zel a, August 18 zing dar 6:30-ah a thi a ni.

MSCW chuan mipa pakhatin hmeichhia nau paw lai a sawisak chungchanga August 16, 2022-a suo moto case a ziah luh pawh August 25, Ningani khan a ngaihtuah a; he thubuaiah hian Mizoram DGP chu opposite party no. 1 niin, Women & Child Development (WCD) Director chu opposite party no. 2 a ni thung.

MSCW tarlan danin, WCD Director chuan August 17-ah chhanna a thehlut. Video hmuh a nih veleh Siahaa Protection Officer leh service provider MChP-te nen hma an lak nghal thu te, sawisak tawktu Lalnunnemi'n One Stop Centre-a awm aiin, amah hringtu hnena khawsak a duh avangin a nu bulah dah a nih thu te, counselling leh damdawi pek a nih thute tarlan a ni.

DGP pawhin police-te hmalak dan August 24, 2022 khan MSCW-ah a thlen a; video a darh ní-ah hmeichhe sawisatu nia ngaih Lalramdinsanga s/o SB Gurung, Siahatla-II, Siaha district chu police-in an man thu te, IPC 323/324/352/498A leh JJ Act Section 75 hmangtein Siaha Police Station-ah thubuai ziah luh a nih thute a tarlang.

Lalramdinsanga chu Siaha District Jail-ah dah a nih thu te, Lalnunnemi leh video-a lang naupang an hliam nat loh thu te, theihtawp chhuaha an bawhzui zel dawn thute DGP chuan a tarlang bawk a; police hmalak dan chu lawmawm an tih thu MSCW chuan a tarlang a ni.