Lunglei YMA-in Lunglei MLA te an sawm

YMA Sub-Headquarters, Lunglei hruaitute chuan August 25, Ningani khan Aizawl - Thenzawl - Lunglei World bank kawng chhe chungchang sawipui atan Lunglei MLA-te léngah an sáwm a, hmalakpuiah MLA-te an sáwm. Inkawmnaah hian dam lohna leh rokhawlhna avangin MLA pathum an tel thei lo a, Lunglei East bialtu MLA Lawmawma Tochhawng chiah a tel.

Lunglei Sub-Hqrs YMA president Lalrotluanga chuan, Aizawl aṭanga Lunglei panna kawngpui chu tun hma anga chhe lutuk a nih leh an hlau a, mipui leh YMA-in an vei hle tih a sawi a, "Hetiang taka kawng a chhiat avang hian a enkawltu department lamte nen pawh kawng hrang hranga sawiho a ni tawh a, harsatna awmte sutpui tur chuan Lunglei MLA-teah beiseina lian tak kan nei a ni," a ti.

Lawmawma Tochhawng chuan, MLA-te'n an hmalaknate sawiin, "Mahni zâwnah ṭheuh theihtawp tak meuh kan chhuah. Kawngpui siamṭhat ni mah se, a daih rei lo. MLA dangte nen kokim zawka sawiho leh a ṭhain ka ring," a ti a; PWD changtu Chief Minister sawipui a tum thu a sawi.

Inkawmnaa tel PWD hotute sawi danin, Lunglei-Aizawl World Bank Road-a Lunglei lam hnaih chu Bhaviya company enkawl lai a ni a, kawngpui chhe lai siamṭhat mawhphurhna (defect liability) an la nei a, chuvang chuan Mizoram sorkarin kawng siamṭhatna tur sum a ruahman thei lo. PWD-in nasa taka kawng enkawltu Bhaviya an nawr chung pawhin a hlawhtlinna an hmu tam thei lo a, company neitupa ber chu koh kal a harsa hle a ni.

Lunglei YMA hruaitute chuan, Bhaviya neitupa biakpawh chungchangah Chief Minister inrawlh tura ngên turin MLA an beisei tih an sawi a, "YMA chuan hmaichhanah company-te harsat­na leh Lunglei mipui harsatna­te sawiho theih kan duh a ni," an ti.

Lunglei khawpui luh hma kawng chhe zual lai chu tlo zawka siam a nih theihna turin rigid pavement-a siam ṭha an tih thu Lunglei YMA hruaitute chuan an sawi bawk.

Inkawmhonaah hian Lunglei khawpui chhunga kawngpui chhe lai siam dan tur chungchang pawh sawiho a ni a; PWD hotute chuan, kawng siamna atan cheng vbc. 5 chuang ruahman a nih thu leh contractor a inhmakhua mek thu an sawi.