Serchhip District Hospital building Sak thuai phûtin PIL thehluh tum

Joint Action Committee on Serchhip District Hospital Site (JACoSDHS) chuan, Serchhip District Hospital building thar sak thuai a nih theih nan Gauhati High Court-ah public interest litigation (PIL) thehluh an tum. Hemi chungchangah hian nimina Serchhip Press Club-a ṭhutkhawmnaah thutlukna an siam a ni.

JACoSDHS tarlan danin, Serchhip District Hospital thar sakna atan Power Grid Corporation of India-in Mizoram sorkar hnenah cheng vbc. 21 an pe a; May 27, 2022 khan khum 100 awmna tur damdawi-in sakna atan chief minister Zoramthanga hoin CM conference hall-ah thawhhona thuthlung ziah a ni tawh.

Thawhhona thu­thlung­ah hian Chief Minister bakah PGCI hotu te, Health department hotute leh Serchhip DC an tel.

Damdawi-in thar tur chu thla 24 (kum hnih) chhunga sak zawh tura rua­hman a ni a, RCC building chhâwng ruka sak tur a ni. HFW department chu implementing autho­rity tur a ni a, en zui hna (supervision and monito­ring works) chu Serchhip DC kutah dah a ni.

Serchhip District NGO Coordination Committeee chuan damdawi-in sakna atan Bûkpui ram an rawt a, district thuneitute pawhin ruahmanna thui tak an kalpui hman a ni. Mahse, Serchhip NGO lamin ram chungchangah tihfel ngaite an tihfel lawk loh avangin damdawi-in chu a hmun ngai, Bazar Venga sak turin detailed project report (DPR) siam a ni a, chumi tur chuan PGCI aṭangin cheng vbc. 21 hmuh a ni.

A hmun ngaia damdawi-in sak tura sum dil pek chhuah a nih hnuah Serchhip Joint NGO-te'n Bûkpuia sak a nih theih nan hma an la thar leh tih sawiin JACoSDHS hruaitute chuan, "Hei hi duh loin Serchhipa miṭhahnemngai kalkhawmin pawl kan din ta a ni," an ti.

JACoSDHS hruaitute chuan, VC, YMA, MUP leh MHIP branch hrang hrangah seal leh signature hmangin ngaihdan an lak thu sawiin, "August 16, 2022 khan Chief Minister a pisa-ah kal chilhin, a hmun ngaia sak duh an tam zawk thu kan thlen," an ti a; chutiang a nih lai chuan, tun thlengin damdawi-in tur sak ṭan a la nih loh avangin a hmun ngaiah sak a nih theih nan PIL thehluh an rêl tâk thu an sawi a ni.