Rs 3,00,000 a tlin hma chuan sorkarin SEDP pek zel a tum - Minister Lalzirliana

Mizoram sorkar flagship programme, Socio Economic Deve­lopment Programme (SEDP) chu nimin khan Saitual district tan Saitual College auditorium-ah hawn a ni a, bialtu MLA leh minister R Lalzirliana'n a hawng.

Saitual district-ah hian Assembly bial pathum awmin, SEDP ṭanpuina sum dawngtu tur chhungkua 4,500 an awm a, chu chu Mizoram puma SEDP sum dawngtu tur 60,000 aṭangin 7.50% a ni. Mi 4,500 zinga mi 1,068 chuan vawk vulh an thlang.

Saitual district-a chhungkua 4,500-te chu AH&Vety department-ah 1,681, Agriculture department-ah 1,268, Commerce & Industries-ah 604, Fisheries department-ah 93, Horticulture depart­­ment-ah 508, Land Resources, Soil & Water Conservation depart­ment-ah 286, Sericul­ture department-ah 41 leh UDPA department-ah 19 an awm.

Minister chuan, SEDP ṭanpuina sum pek tur chu first instalment a ni a, nakkumah instalment dang pek a ni dawn tih sawiin, Rs 3,00,000 a tlin hma chuan sorkarin pek zel a tum tih a sawi a ni.

R Lalzirliana chuan, "Sawiselna karah a taka SEDP kalpui a, sum pek chhuah tur ruahman a ni ta hi a lawmawm a, SEDP hi mirethei leh chhumchhiate khai chhuahna programme a ni," a ti.