Mizoram COVID-19 : Dinhmun ; Covid-19 vei enkawl lai mi 588 an awm

August 25, Ningani khan Mizoramah Covid-19 vei mi 125 hmuh chhuah a ni a, August thla chhungin mi 3,870 hmuh chhuah a ni tawh. Nimin khan hripui vei dam tawh mi 108 chhuahtir an ni a, Covid-19 vanga thi an awm lo. Nimin tlai khan hripui vei enkawl lai mi 588 an awm.

Ningania Covid-19 positive hmuh thar mi 125-te chu mipa 62 leh hmeichhia 63 an ni a, ZMC RT-PCR laboratory-a hmuh chhuah mi pakhat leh RAT hmanga hmuh mi 124 niin, swab sample endik zat 586 aṭanga positivity rate chu 21.33% a ni.

IDSP record angin, Mizoramah Covid-19 vei 2,36,670 hmuh chhuah a ni tawh a, mipa 1,10,204 leh hmeichhia 1,26,466 an ni a, mipa aiin hmeichhia 16,262-in an tam zawk. Nimin tlai dar 5 thleng khan mi 2,35,365 (99.45%) chhuahtir an ni tawh a, mi 717 (0.30%) thi tawhin, enkawl mek mi 588 (0.25%) an awm.

Kum 2011 chhiarpui angin, Covid-19 vei hmuh tawh 2,36,670 chu state mipui zat aṭangin 21.57% a tling a, India rama state zingah a sang ber. Mi 1,000 zelah positive 215 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.