KHAWTHLIR

Thisen pe
ṬKP, Hunthar Veng unit chuan nimin khan Civil Hospital, Aizawl blood bank tan thisen unit 11 an pe a, petute mipa pasarih leh hmeichhia pali an ni.

Training hmanpui
ZPM Aizawl West-III Block chuan nimin khan Mission Vengthlanga Hmingliani Dining Hall-ah Political Training an buatsaih a, ZPM leader Lalduhoma, bialtu MLA VL Zaithanzama leh bialtu councillor Ramthanzauvi ten an hmanpui.

MLA-in tuizém pe
Human Resource Development Board vice chairman L Thangmawia, MLA chuan nimin khan vohbik naupangte tana Ephatha Society of Mizoram-in an din, Ephatha Special School, Kulikawn hnenah tui litre 2,000 dawng tuizém a hlàn. L Thangmawia chuan hun khirh tak Mizoramin a tawn mek laiin, state sorkarin a tih theih ang angah vohbikte tan ke a pen mek zel niin a sawi.

Phalna nei loa Lei laite hrem
Aizawl Municipal Corporation (AMC) chuan AMC aṭanga phalna nei loa lei lai Peter Malsawmtluanga, Sihphir leh Lalrinchhana Fanai, Ramthar Vengte chu an hrem a, Rs 5,000 ve ve an chawitir bakah, lei laih titawp nghal turin an hriattir. Aizawlah lei laih vanga chhiatna a thlen loh nan AMC chuan kumin July-October chhung chu lei laih leh leivûng hmanga ruam/kawr chhun khah a khap a ni.

Adopted village
T Romana College chuan kum 2022-2024 chhunga adopted village atan Sialsuk khua an thlang a, nimin khan Sialsuk YMA Inpuiah adopted village project an hawng a, bialtu MLA Prof. F Lalnunmawia'n a hmanpui. Hawnna inkhawm hi TRC Research, Innovation & Extension Cell chairman Prof. Malsawmliana'n a kaihruai a; TRC principal Dr Jennifer Lalbiakdiki leh Sialsuk VCP R Lalruatkima ten thu an sawi. Thawhhona thuthlung ziah a ni bawk.