2022-23 ah Mizoram sorkarin RBI sum vawi 36 a pûk tawh

Mizoram sorkar chuan sorkar kum kal mek, 2022-23 chhungin August 11, 2022 thlengin Reserved Bank of India (RBI) aṭangin sum pûk dan chi hrang hrang hmangin vawi 36 sum pûk tawhin, cheng vbc. 993.57 a pûk tawh. Hetih lai hian, Mizoram sorkar sum dinhmun a ṭhat loh ber lai pawhin Treasury khâr tura tih a la ni ngai lo.

RTI Act hmanga zawhna Finance department-in August 22, 2022-a an chhan danin, sorkar kum kal mekah Mizoram sorkarin RBI aṭangin Overdraft hmangin sum vawi sarih a pûk tawh a, chu'ngte chu kumin July 27 leh August 3 inkara a pûkte a ni. Special Drawing Facility (SDF) hmangin vawi 19 leh Ways and Means hmangin vawi 10 sum a pûk tawh bawk.

SDF hmanga Mizoram sorkarin kum kal meka RBI aṭanga sum a pûk tawh zawng zawng chu cheng vbc. 366.5 a ni a, Ways & Means hmanga a pûk tawhte chu cheng vbc. 370.68 niin, Overdraft hmanga a pûk tawh zat chu cheng vbc. 256.39 a ni. SDF, Ways and Means leh Overdraft hmanga kum kal meka sum a pûk tawh zawng zawng chu cheng vbc. 993.57 a tling.

Sorkar kum liam ta, 2021-22 chhung khan Overdraft hmangin ṭum thum RBI aṭangin sum pûk a ni a, Ways and Means hmangin ṭum 101 pûk a ni bawk a; SDF hmangin pûk a ni lo.

Kum 2020-21 chhung khan Overdraft hmangin sum pûk a ni lo a; SDF hmangin vawi 13 leh Ways and Means hmangin vawi 47 pûk a ni bawk.

Zawhna chhángin Finance department chuan, kum 2000-01 hnu lamah Mizoram sorkarin sum dinhmun chhiat avangin treasury khâr tura tihna RBI emaw, sorkar laipui emaw aṭangin a la dawng ngai lo tih an tarlang.

Finance SPIO chuan, Mizoram sorkar sum dinhmun chhiat zual lai, kumin July 1 aṭanga August 11 thleng khan Mizorama treasury-te chu 'stoppage of payment' dinhmunah a awm lo tih a tarlang a, "Chutihrual chuan, heng hun lai hi sum dinhmun harsat zual lai a ni a, treasury khâr ngai khawpa dinhmun chhe zawk 'stoppage of payment' kan tawh lohna turin treasury tinte aṭanga sum pek chhuah nasa taka tihtlem a ni," a ti.

Mizoram sorkarin leibá a neih zat dik tak (actual) hriat theih hnuhnung chu kum 2020-21 kha a ni a, chumi kuma sorkar leiba neih zat chu cheng vbc. 9,881.09 a ni tih Finance department chuan a tarlang bawk.