Zirlai naupang saruaka hawtirtu Thangpui P/S zirtirtu man a ni

Lunglei district-a Thangpui Primary School-a zirlai naupang pakhat saruaka sikul aṭanga hawtirtu nia sawi PC Lalbiakengi, SSA teacher chu August 27, Inrinni khan police-in an man. Hetih lai hian, Thangpui khawtlang chuan PC Lalbiakengi chu an hriatthiam thu an tarlang.

Thu dawn danin, Thangpui P/S zirtirtu PC Lalbiakengi chu a zirlai hmeichhe naupang pakhat saruakin sikul aṭangin a hawtir nia sawi a nih chungchangah Child Welfare Committee (CWC), Lunglei chuan August 27 khan an ko a ni.

District Child Protection Unit (DCPU), Lunglei-in an zinga thawktu pakhat hmingin Lunglei Police Station-ah first information report (FIR) an thehlut a, chuvang chuan police-in an man a ni. PC Lalbiakengi lakah hian Juvenile Justice (Care and Protection) Act Section 75 tlawhchhanin thubuai ziah luh a ni.

Hetih lai hian, Thangpui VC, YMA leh MHIP-te chuan thuchhuah inṭâwm siamin, an khaw P/S-a zirlai pakhat uniform hlihsak a nih chhan an hriat chian hnuah, hlihsaktu zirtirtu chu an hriatthiam thu an tarlang.

Thangpui khawtlang hruaitute chuan, naupang nu Lalnunsangi'n social media-ah thil dik tâwk lo a thehdarh nia sawiin, an dem thu leh, thil thleng chu Lalnunsangi'n sikul inkaihhruaina a bawhchhiat vanga thleng nia an hriat thu an sawi.

Thangpui VC, YMA leh MHIP tarlan danin, naupang inhauh vangin Lalnunsangi chu Thangpui P/S-ah tiang nen kalin, naupangte rîkrâp a, a fate chu sikul kal tawh lo turin a hruai chhuak a ni. Lalnunsangi chêt dan avang te, a fate chu sikul kaltir a tum tawh loh thu a sawi avang leh zirlai zingah uniform chang lo an awm avangin PC Lalbiakengi chuan Lalnunsangi fa chu uniform a hlihsak nia an hriat thu an tarlang bawk.

Thangpui khua hi Lunglei khawpui aṭanga chhimthlang lam km. 8 vela hláa awm a ni.