Setlâk Water Treatment Plant-ah hna thawh tur 92% thawk zo tawh

Chief secretary Dr Renu Sharma chuan August 26, 2022 khan Tanhril ram chhung, Setlak rama SIPMIU-in Aizawl khawpui châwmtu tur tui lâkna, Augmentation of Water Supply and Construction of 37 MLD Water Treatment Plant an siam a tlawh a; SIPMIU hotute chuan, hna thawh tur zinga 92% vel zawh a ni tawh tih an sawi.

SIPMIU project director Lalrothanga chuan, tui lakna thar turah hian Tlawng lui tui chu tihthianghlim a nih hnuah Laipuitlanga tuizém lianah thlen tur a nih thu a sawi a, "Kum 2033 thlenga Aizawl khawpui tui mamawh phuhru tura ngaih a ni. Setlâk aṭang hian pipe phûm a ni a, Vaivawkawn-Hunthar leh Hunthar-Chanmari West-ah metre 200 vel phûm tur a la awm," a ti.

Augmentation of Water Supply and Construction of 37 MLD Water Treatment Plant atan hian cheng vbc. 200 vel hman a nih tawh thu leh, hna 92% vel thawh zawh a nih tawh thu SIPMIU Project Director chuan a tarlang bawk.

Setlâk Water Treatment Plant hi Aizawl khawpui tana tui thianghlim lâkna tur hmun thar a ni a, Aizawl hmar lama veng hrang hrang châwm tura duan a ni. Greater Aizawl Water Supply Scheme Phase I&II hmangin ni tin tui litre nuai 280-340 vel a pump theih laiin, Setlak Water Treatment Plant aṭangin ni tin tui litre nuai 370 pump chhuak thei tura duan a ni.

Setlâk Water Treatment Plant hi hman a nih hunah chuan Aizawl khawpuiin tui a hmuh zat chu a lêtin a pung thei dawn a; ram pum huapa mi pakhatin ni tin tui thianghlim a dawn tur zat bituk litre 135 chu Aizawl khawpuia chengte'n an hmu thei dawn niin sorkar thuchhuah chuan a tarlang.

Chief secretary Renu Sharma-i'n Water Treatment Plant a tlawhnaah hian UDPA secretary Lalmalsawma Pachuau leh sorkar hotu dangte pawh an tel a ni.