Contractor-te ṭha taka thawk tura hrilh turin YMA-in CM an ngen

YMA Sub-Head-quarters, Lunglei hruaitute chuan August 27, Inrinni khan Lunglei bial aṭanga thlan tlin MLA palite Lunglei Circuit House-ah an kâwm a; Aizawl-Lunglei-Thenzawl World Bank kawng siamtu contractor chu hna ṭha taka thawk tura Chief Minister an ngenna an pe.

Lunglei YMA chuan, Aizawl-Lunglei kawng siamtu contractor-in kawngpui chhe lai siamṭhat mawhphurhna (defect liability) thla sarih (September 2022 - March 2023) a la neih thu tarlangin, a mawhphurhna anga kawng siamṭhat hna rintlak leh lungawi thlâk taka thawk tura hriattir turin Chief Minister an ngen a ni.

Chief Minister hnena an ngenna lehkha chu chhim lama MLA-te hnenah an pe a; lehkha copy chu kawngpui chhawrtu Lunglei, Lawngtlai leh Siaha district MLA-te an pe vek a ni.

Aizawl-Lunglei World Bank kawngah Lunglei district hmun ṭhenkhat chu leilungin a zir loh avangin kawng a ṭha rei thei lo nia sawiin Lunglei YMA hruaitute chuan, chhim lam mipui tan an nunna kawngpui a nih si avangin ruahtui tlaka a chhiat leh mai theihna hmun ṭhenkhatahte rigid pavement siam ṭul an tih thu an sawi a; mipui harsatna sutkiansak turin CM an ngen a ni.

Tarlan tawh angin, Lunglei Sub-Hqrs YMA hruaitute chuan August 25, 2022 khan kawng chungchang sawipui turin Lunglei MLA-te léngah an lo sáwm tawh a, mahse, Lunglei North bialtu MLA Lawmawma Tochhawng chaih a tel.

Inkawmnaa tel PWD hotute sawi danin, ATL kawnga Lunglei lam hnaih chu Bhaviya company enkawl a ni a, defect liability an la nei a, chuvang chuan Mizoram sorkarin kawng siamṭhatna tur sum a ruahman thei lo. PWD-in nasa taka kawng enkawltu Bhaviya an nawr chung pawhin a hlawhtlinna an hmu tam thei lo a, company neitupa ber chu koh kal a harsa hle a ni.

Lunglei YMA hruaitute chuan, Bhaviya neitupa biak chungchangah Chief Minister inrawlh tura ngên turin MLA an beisei tih an sawi a, "YMA chuan hmaichhanah company-te harsat­na leh Lunglei mipui harsatnate sawiho theih kan duh a ni," an ti.