Rs 25,000 tal hi chu chhuanlam siam loin sem rawh se: BJP President

BJP, Aizawl district chuan August 27, Inrinni khan Aizawl New Market-ah hmasawnna chanchin ṭha puan chhuahna hun an hmang. Mizoram BJP president Vanlalhmuaka chuan, Mizoram sorkar chu SEDP-ah Rs 25,000 tal chu chhuanlam siam loa a rang thei anga sem turin a ngen.

Vanlalhmuaka chuan, sumah Mizoram sorkar a harsa hle tih sawiin, "Tho chhuak hlei thei lo khawpa chhia a ni hial ang tih a hlauhawm. SEDP erawh sum awm sa an tih avangin mipui hmaa an intiam angin sem thei tawh lo mah se, Rs 25,000 tal hi chu chhuanlam dang siam kual chhên tawh lo a, a rang thei ang bera sem turin ka ngen a ni," a ti.

New Market in pui ber ṭhiah chungchangah Vanlalhmuaka chuan, "A sakna tur sum pek vek tawh a ni chunga mi tam takin eizawnna atana an hman mek tun thlenga sak a la ni lo hi mirethei rahbehna lian tak a ni. Bazar siamna tur sum pawh pên a ni ta hi a pawi hle," a ti a, chawhmeh zuara ei zawngte ruahsûr hnuaiah hrehawm taka an ṭhut a ngaih thu a sawi.

Mizoram BJP President chuan, sum vànzia hretu pakhat chu bazar nu ho an nih thu sawiin, "Kan state-ah hian corruption a nasa em em a, corruption ûm bo a nihna tur chuan CBI hi kan ramah an lo luh a ngai. Corruption dotu department kan neihte hian an duh angin hna an thawk thei lo. BJP chuan CBI kan ko lut ang," a ti.

MNF sorkar chu hnama chiang inti siin Mizo chhûl chhuak aiin Kamrula hna an pe tam zawk nia sawiin Vanlalhmuaka chuan, "Eng hnamah hian nge an chian tih ka zawt a ni. Mizo contractor-te aia Kamrula'n hna a hmuh tam chhan hi MNF party mi leh sate hian ngaihtuah chiangin enliam mai mai a hun tawh lo," a ti a; Mizo hnam din chhuah lehna turin thawhho a ṭul thu a sawi.