Ram siam ṭha turin sawi ngawt ni loin a tiha tih a hun tawh tak zet - Lalsawta

Mizoram Pradesh Congress Committee (MPCC) president Lalsawta chuan, Mizoram siamṭha turin sawi ringawt a tâwk lo a, a tiha tih a hun tawh tak zet tih a sawi.

Lalsawta hian August 27, Inrinnia MPSOA conference hall-ah Aizawl West-III Congress Block Special Conference a hmanpuinaah thu sawiin, "Kan ram siamṭha turin mipuiin min nghak ṭhup. A sawi ni lo, a tiha tih a hun tawh. Kan inthlâk hlawk a ngai. Thluaka sum lut ang chi chu kan zingah an tel ve thei lo ang, tel tur pawhin kan duh lo. Department leh a chhung aṭanga sum lâkna tur hmun hre riau kan mamawh lo," a ti a; ram leh hnam dah hmasa loa politics khel, politician hausa nih tumte chu politics bànsan turin a chah.

MPCC President chuan, Pathianin ram leh mipui ṭha tak a pe tih sawiin, "Ram roreltute'n Pathian duh dan anga ram enkawl hi kan mawhphurhna a ni. Roreltu ṭha neih loh vangin ram leilungin ang reng North Korea leh South Korea dinhmun a indanglam hleih hle," a ti a, taimakna leh rinawmna chu dinchhuahna tur a nih thu a sawi.

Congress party chuan loneitu, kut hnathawktute leh ṭhalaite tan eizawnna ngêlnghet siam an tum thu sawiin Lalsawta chuan, "Chutiang tur chuan kan tih ṭhin dan tihdanglam a ngai. Thar tam a ngai a, thar chhuahte hralh châkawm tak tura a ṭhat a ngai. Thar tamin a tláwm a, ei pha kan tam a, siam danglam leh thawn chhuah pawh nasa takin a awlsam phah a ni," a ti.

MPCC President chuan, dan rorelna ngaih pawimawh a ṭul thu sawiin, "Mizoram mipuite chu court rorelna hnuaia thutluknaah an ngaih a ṭha ta chiah lo niin a lang. Thil dik lo ti ṭheuh ṭheuh, MLA tih sual leh veng kil tawpa hmeithai fa tih sual thutlukna a danglam mek a ni," a ti a; Mizoram chu misual tlémtê ṭangrualin mi ṭha, ṭangrual ve lote an hnehna ram a ni tur a nih loh thu a sawi.