Ram tana mawhphurhna la ngam roreltu nih kan tum - K Sapdanga

ZPM party working president K Sapdanga chuan, ram tana mawhphurhna la ngam roreltu nih an tum thu leh Mizo hnam chhuan la awm zel tur tan pawi khawih ve loh hrâm an tum thu a sawi.

K Sapdanga hian ZPM hruaitute dangte nen Mizoram khawchhak lam an fannaah August 27, Inrinni khan Khawzawl Vengthar leh Keifangah thu sawiin, "Ram tana mawhphurhna la ngam roreltu nih kan tum a, ram roreltute hi kum nga chhung atana thlan an ni. Inthlan leh huna tlin duh luat vanga dikna kenkawh ngam loh te, tih tur pawimawh tih ngam loh te, tih loh tawp tur tih luih tlat chìnte hi he ram hian a chhiat phah rei ta," a ti.

Mizoram chu sorkar ṭha neih châkin a tuihâl tih sawiin Sapdanga chuan, "Mipui tuihâl chhan chu, tui in tur ṭha kan hmuh lohna a rei tawh vang a ni. Kan ram tuihâlna tireh theitu chu political party-te ni loin, mipui kan ni," a ti a; mamawhte neih theih beiseia political party thlan tlin tawhte'n mipui mamawh an la pe thei lo nia a lan thu a sawi.

State dangte aiin kawng tinréngah Mizoram a hnufual fál nia sawiin K Sapdanga chuan, "BPL kan la pung zel a, zirnaah kan hnufual telh telh a, kan ṭhalaite tan hna thawh tur a váng em em a, ram leiba kum tin a pung zel thung. Kan tu leh fate tan phurrit kan hnutchhiah tam tial tial a, Zoram mipui hian ram chhan chhuak turin hmanruaah ZPM hi min hmang turin mipui kan sáwm a ni," a ti.

ZPM Working President chuan, kum 2018-ah engmahloa bul ṭan chungin bial pariat an lak thu sawiin, "Rorel lai Congress party-te'n MLA 34 an neih aṭangin bial panga an la a, ramri hrúlah chauh an chak. ZPM min hruaitu hi Pathian a ni a, headquarters-a kan hotute an ṭang em em a, block leh unit-te hmun tinah an phûr hle," a ti a; an khingpuite an mangang tawh hle niin a sawi.