Kum 2022-ah Lawngtlai district-ah HIV vei mi 49 hmuh chhuah a ni tawh

Lawngtlai District AIDS Prevention and Control Committee (DAPCC) chu an chairman Amol Strivastava, bawrhsap kaihhruaiin August 26, 2022 khan an ṭhukhawm. Kumin January aṭanga August thla chhungin Lawngtlai district-ah mi 920 endik aṭangin HIV vei mi 49 hmuh chhuah a nih thu tarlan a ni.

Lawngtlai District AIDS Control officer Dr S Thaizi chuan, kuminah January aṭanga August thlengin Siaha district-ah mi nâwlpui (general client) mi 456 endik aṭangin HIV vei mi 44 hmuh chhuah a nih thu a sawi a, "Nu nau pâi 464-te thisen endik aṭangin HIV positive panga hmuh a ni. Oral substitution therapy (OST) centre aṭanga OST la mek mi 170 an awm mek," a ti.

Dr S Thaizi chuan, Lawngtlai district-ah buprenorphine supply tam zawk an mamawh belh thu te, Anri Retroviral Therapy (ART) damdawi la mek mi 258 an awm thu te, HIV positive zingah chhungkaw harsatna avanga veivahna chungchanga harsatna nei an awm thute a sawi bawk.

Ṭhutkhawmah hian, OST damdawi supply chungchang chu DC aṭangin thuneitute hnenah lehkhaa thlen leh veivahna harsat avanga ART damdawi la mumal thei lote harsatna sutkian dan turte an rél a ni.

Integrated Counselling And Testing Center (ICTC) leh ART centre ruahmanna siam ngai chungchangah DC-in damdawi-in a tlawh hunah a hmunah sawiho ni se, an ti a; HIV/AIDS hluar zel tur vênna atana hmalak dan tur te, positive hmuh tharte hnenah a khát tâwka counselling pek a ṭul thute an sawi bawk.