Lungsenah total bandh neih an rél

Lungsen NGO Coordination Committee chuan, Lungsen High School-ah zirtirtu nghet dah an phût chu sorkarin a tihhlawhtlin loh avangin vawiin leh naktukah Lungsena sorkar pisa leh sikul zawng zawng an dang dawn a, August 31 aṭangin total bandh huaihawt an tum.

Lunglei NGO hrang hrang hruaitute chu August 26, Inrinni zan khan an ṭhukhawm a; Lungsen High School-a mathematics leh science zirtirtu sawn chhuah an nih avanga sorkar karna atana an khuaa sikul zawng zawng an khârin awmzia a neih loh avangin vawiin Thawhṭanni leh naktuk Thawhlehniah Lungsena sorkar pisa zawng zawng dan an rél a; chu chuan awmzia a la neih loh cheu chuan August 31, Nilaini aṭangin total bandh huaihawt an rél bawk.

NGO Coordination Committee hian an hmalak zel dan tur chu August 26, 2022-ah Lungleia thuthar thehdarhtute hmaa puan an tum a, mahse, inkal pawhna kawngah harsatna a awm avangin an ṭhulh a ni.

Lungsen NGO-te chuan, thu chhuahin, Mizoram sorkarin Lungsen H/S-ah zirtirtu pasarih a awm tih a tarlan chu a dik lo an ti lo tih an tarlang a; an lungawi lohna leh an phût ber chu regular teacher (a ngheta thawk) dah lêt leh a nih thu leh, an dinna ngaiah a tàwp thlenga an din dawn thu an tarlang bawk